ប្រទេសឥណ្ឌាបានជួបប្រទះនឹងករណីសង្ស័យពីការមានជំងឺសុរិយរោគជិត ២៥.០០០ករណី ហើយមនុស្សយ៉ាងតិច ៨៧នាក់ បានបាត់បង់ជីវិត បន្ទាប់ពីមានរលកកម្ដៅជាច្រើនថ្ងៃ នៅទូទាំងប្រទេស ចាប់ពីខែមីនា ដល់ខែឧសភា។

ខែឧសភា គឺជាខែដ៏អាក្រក់ជាពិសេស សម្រាប់តំបន់ ដោយសីតុណ្ហភាព នៅក្នុងរដ្ឋធានី Delhi និងរដ្ឋក្បែរខាង Rajasthan ឡើងដល់ ៥០អង្សាសេ។ ផ្ទុយទៅវិញ ផ្នែកខ្លះនៃភាគខាងកើតប្រទេសឥណ្ឌា បាន និងកំពុងរងឥទ្ធិពលពីព្យុះស៊ីក្លូន Remal។ ភ្លៀងធ្លាក់ខ្លាំង នៅរដ្ឋ Assam ភាគឦសាន បានបណ្ដាលឲ្យមនុស្សយ៉ាងហោចណាស់ ១៤នាក់ ស្លាប់ ចាប់តាំងពីថ្ងៃទី២៨ ខែឧសភា។

ជាមួយគ្នានេះ មជ្ឈមណ្ឌលគ្រប់គ្រងគ្រោះមហន្តរាយរបស់ប្រទេស កាលថ្ងៃអាទិត្យ (ទី២ ខែមិថុនា) បានឲ្យដឹងថា នៅប្រទេសកោះស្រីលង្កា មនុស្សយ៉ាងហោចណាស់ ១៥នាក់ បានស្លាប់ដោយសារទឹកជំនន់ និងបំណាក់ដី បន្ទាប់ពីភ្លៀងមូសុងយ៉ាងខ្លាំង បានវាយប្រហារតំបន់នេះ។

គួរបញ្ជាក់ថា កត្តារួមផ្សំជាច្រើនបាននាំឲ្យមានរដូវក្តៅក្តៅខ្លាំង នៅអាស៊ីខាងត្បូង ជានិន្នាការ ដែលអ្នកវិទ្យាសាស្ត្រ និយាយថា មានសភាពកាន់តែអាក្រក់ទៅៗ ដោយសារបម្រែបម្រួលអាកាសធាតុ ដែលបង្កឡើងដោយស្នាដៃរបស់មនុស្ស។

មន្ត្រីបោះឆ្នោតជាន់ខ្ពស់មួយរូប បាននិយាយកាលពីថ្ងៃអាទិត្យថា យ៉ាងហោចណាស់បុគ្គលិកបោះឆ្នោតឥណ្ឌាចំនួន ៣៣នាក់ស្លាប់នៅថ្ងៃចុងក្រោយនៃការបោះឆ្នោត ដោយសារជំងឺសុរិយរោគ នៅក្នុងរដ្ឋតែ១ បន្ទាប់ពីសីតុណ្ហភាពដ៏ក្តៅគគុកបានគ្របដណ្តប់ទូទាំងប្រទេស។ រលកកម្ដៅដែលមិនធ្លាប់មានពីមុនមក នៅប្រទេសឥណ្ឌាបានឆក់យកជីវិតមនុស្សជាង ៤៥នាក់ ក្នុងរយៈពេល ៣៦ម៉ោងចុងក្រោយនេះ។ ជាមួយចំនួននេះ ចំនួនអ្នកស្លាប់ដោយសាររលកកម្ដៅ នៅទូទាំងប្រទេសបានឡើងដល់យ៉ាងហោចណាស់ ៨៧នាក់ហើយ។

តែយ៉ាងណាក្ដី ការិយាល័យអាកាសធាតុបានព្យាករថា ស្ថានភាពរលកកម្ដៅនឹងមិនសូវធ្ងន់ធ្ងរ រហូតដល់ថ្ងៃទី៥ ខែមិថុនា ហើយការមកដល់ដំបូងនៃខ្យល់មូសុង កាលពីសប្តាហ៍មុន នៅក្នុងរដ្ឋ Kerala ភាគខាងត្បូង ត្រូវបានគេរំពឹងថា នឹងនាំឲ្យកម្ដៅថយចុះបន្ថែមទៀត៕