ចំណាត់ការនេះ បានចាប់ផ្តើមជាមួយនឹងលោក Timur Ivanov ជាអនុរដ្ឋមន្ត្រីការពារជាតិរបស់ប្រទេស   រុស្ស៊ី ដែលត្រូវបានចាប់ខ្លួន បន្ទាប់ពីត្រូវបានចោទប្រកាន់ពីបទទទួលសំណូក «ក្នុងទ្រង់ទ្រាយធំមួយយ៉ាងពិសេស»។

បន្ទាប់លោកឧត្តមសេនីយ៍ទោ Yuri Kuznetsov ប្រធាននាយកដ្ឋានបុគ្គលិកនៃក្រសួងការពារជាតិ ក៏បានត្រូវបានចាប់ខ្លួន។ លោកត្រូវបានចាប់ខ្លួន ក្រោយពីប្រាក់ជាង ១០០លានរូប្លិ៍ (ជាង ១លានដុល្លារ) កាក់មាស និងវត្ថុមានតម្លៃផ្សេងទៀត ត្រូវបានរឹបអូសពីគេហដ្ឋានរបស់ខ្លួន។

ការចាប់ខ្លួននោះ គឺត្រូវបានធ្វើឡើង បន្ទាប់ពីការចាប់ខ្លួនអតីតមេបញ្ជាការកងទ័ពចម្រុះឆ្មាំទី៥៨ លោក Ivan Popov និងក្រោយមកឧត្តមសេនីយ៍ Vadim Shamarin និងមន្ត្រីក្រសួងការពារជាតិ លោក Vladimir Verteletsky។

រលកនៃការចាប់ខ្លួន បានកើតឡើង ជាផ្នែកមួយនៃការជំរុញមួយ ដើម្បីលុបបំបាត់អំពើពុករលួយ នៅក្នុងក្រសួងការពារជាតិរបស់ប្រទេសរុស្ស៊ី ដែល«បានចាក់ឫសយ៉ាងជ្រៅ»។ នេះបើយោងទៅតាមក្រសួងការពារជាតិចក្រភពអង់គ្លេស។

លោក John Foreman អតីតមន្ត្រីការពារជាតិអង់គ្លេសនៅទីក្រុងមូស្គូ បានពណ៌នាអំពើពុករលួយថា ជា «មហារីក» នៅក្នុងក្រសួងការពារជាតិរបស់ប្រទេសរុស្ស៊ី ដោយបន្ថែមថា ការចាប់ខ្លួន និងការរុះរើក្រសួងបង្ហាញថា អ្វីៗនឹងមិនមានផែនការសម្រាប់ប្រទេសរុស្ស៊ីទេ។