កាលពីថ្ងៃអាទិត្យម្សិលមិញ ក្រុមគ្រួសារចំណាប់ថ្នូរដែលត្រូវបានចាប់ខ្លួននាំយកទៅតំបន់ហ្កាហ្សាស្រ្ទីប បាននាំគ្នាតវ៉ានៅក្រៅការិយាល័យរបស់លោកនាយករដ្ឋមន្រ្តី Benjamin Netanyahu ស្ថិតក្នុងទីក្រុងហ៊្សេរុយសាឡឹម ដើម្បីជំរុញឲ្យលោកព្រមទទួលយកកិច្ចព្រមព្រៀងបទឈប់បាញ់ ស្នើសុំដោយប្រធានាធិបតីសហរដ្ឋអាមេរិកលោក Joe Biden ។

ជំនួយការរបស់លោក Netanyahu បាននិយាយថា អ៊ីស្រាអែល បានយល់ព្រមចំពោះក្របខ័ណ្ឌសម្រាប់ផែនការរបស់លោក Biden ដើម្បីបញ្ចប់សង្រ្គាមនៅតំបន់ហ្កាហ្សា ទោះបីជាលោកបាននិយាយថា វាពុំមែនជាកិច្ចព្រមព្រៀងដ៏ល្អក៏ដោយ ។

ទោះបីជាយ៉ាងណាក៏ដោយ លោក Netanyahu បាននិយាយកាលពីថ្ងៃសៅរ៍ថា ពុំអាចមានកិច្ចព្រមព្រៀងអចិន្រ្តៃយ៍នៅតំបន់ហ្កាហ្សាស្រ្ទីបនោះទេ រហូតដល់ក្រុមហាម៉ាស់ត្រូវបានកម្ទេសអស់ ជាហេតុធ្វើឲ្យមានមន្ទិលសង្ស័យដល់សំណើរបទឈប់បាញ់របស់លោក Biden ។

លោក Biden បានប្រកាសកាលពីថ្ងៃសុក្រ ថា អ៊ីស្រាអែល បានស្នើផែនការ ៣ដំណាក់កាល ដែលនៅទីបំផុតនឹងនាំឲ្យមានបទឈប់បាញ់ពេញលេញនៅក្នុងតំបន់ហ្កាហ្សា ព្រមទាំងការដោះលែងចំណាប់ថ្នូរទាំងអស់ ដែលត្រូវបានឃុំខ្លួននៅទីនោះ អស់រយៈពេល ៨ខែមកហើយ ។ លោក Biden បាននិយាយថា វាជាពេលវេលាត្រឹមត្រូវ ដើម្បីបញ្ចប់សង្រ្គាម ៕