យោងតាមការអះអាងរបស់ក្រុមអាជ្ញាធរក្នុងស្រុក បានឲ្យដឹងថា មនុស្សយ៉ាងហោច ១២នាក់ បានស្លាប់ និង មនុស្ស ៥នាក់ផ្សេងទៀត បាត់ខ្លួន ក្រោយភ្លៀងធ្លាក់ខ្លាំង បានវាយប្រហារប្រទេសស្រីលង្កា បណ្តាលឲ្យមានបំណាក់ដី និងទឹកជំនន់ កាលពីថ្ងៃអាទិត្យ ។

ទីភ្នាក់ងារគ្រប់គ្រងគ្រោះមហន្តរាយស្រីលង្កា រាយការណ៍ថា ស្រុកចំនួន ២០ ក្នុងចំណោមស្រុក ២៥នៅក្នុងប្រទេសកោះមួយនេះ បានរងផលប៉ះពាល់ដោយសារទឹកជំនន់ ក្នុងនោះស្រុកចំនួន ៥ស្ថិតនៅក្នុងការប្រកាសអាសន្នទឹកជំនន់ធំ ស្របពេលដែលកម្រិតទឹក ឡើងដល់កម្រិតគ្រោះថ្នាក់ ។

ទីភ្នាក់ងារមួយនេះ និយាយថា មនុស្សជាង ៤ម៉ឺននាក់ បានរងផលប៉ះពាល់នៅទូទាំងប្រទេស ហើយភ្លៀងធ្លាក់ខ្លាំងបានរំលើងដើមឈើ ផ្តួលរំលំបង្គោលភ្លើង និងកាត់ផ្តាច់ចរន្តអគ្គិសនីដល់ពលរដ្ឋរាប់ម៉ឺននាក់ ។

ក្រសួងឧតុនិយមស្រីលង្កា រាយការណ៍ថា ទឹកភ្លៀងខ្ពស់បំផុតកម្ពស់ ៤៨០មីលីម៉ែត្រ ត្រូវបានរកឃើញនៅតំបន់ភាគកណ្តាលស្រីលង្កា ។

ដោយឡែក សាលារៀននៅទូទាំងប្រទេសបានបិទទ្វារនៅថ្ងៃចន្ទនេះ ក្នុងនោះសាលារៀននៅតំបន់ភាគខាងត្បូងប្រទេស នឹងបន្តបិទទ្វាររហូតដល់ថ្ងៃពុធ ៕