ឆ្មាំល្បាតសមុទ្រចិន (CCG) ត្រូវបានចោទប្រកាន់ថា បានបទរឹបអូស និងបោះចោលអាហារ និងគ្រឿងសម្ភារផ្គត់ផ្គង់ផ្សេងទៀត សម្រាប់កងទ័ពហ្វីលីពីន ដែលឈរជើងនៅប៉ុស្តិ៍ដាច់ស្រយាលមួយ ក្នុងតំបន់ថ្មប៉ប្រះទឹក Second Thomas Shoal ហើយត្រូវបាននិយាយថា បានរារាំងការជម្លៀសវេជ្ជសាស្រ្ត ចំពោះទាហានដែលកំពុងមានជំងឺ។

ក្នុងលក្ខខណ្ឌមិនបញ្ចេញឈ្មោះ ដោយសារខ្លួនមិនមានសិទ្ធិនិយាយទៅកាន់បណ្ដាញសារព័ត៌មាននោះ មន្ត្រីយោធាជាន់ខ្ពស់ ១រូប បានឲ្យដឹងថា ហេតុការណ៍ទាំង ២នេះ បានកើតឡើងកាលពីទី១៩ ខែឧសភា នៅពេលដែលកងទ័ពជើងទឹកហ្វីលីពីន បានធ្វើប្រតិបត្តិការទម្លាក់ជំនួយពីយន្តហោះ ដើម្បីនាំយករបស់របរទៅកាន់នាវា BRP Sierra Madre ជានាវាចម្បាំងចាស់ទ្រុឌទ្រោមដែលបានត្រូវចត ក្នុងឆ្នាំ១៩៩៩ ដើម្បីការពារការទាមទាររបស់ទីក្រុងម៉ានីលចំពោះតំបន់ថ្មប៉ប្រះទឹកនេះ។

មន្ត្រីរូបនោះដដែល បានប្រាប់ទៀតថា នៅក្នុងឧបទ្ទវហេតុទី៣ កាលពីថ្ងៃទី២៤ ខែឧសភា CCG បានប្រើកាណុងបាញ់ទឹក ដើម្បីបណ្តេញទូកនេសាទហ្វីលីពីន នៅក្បែរតំបន់ថ្មប៉ប្រះទឹកនោះ។

ប្រភពពីសារព័ត៌មាន Inquirer បានធ្វើបញ្ចេញការចោទប្រកាន់នោះ ពោលគឺប៉ុន្មានម៉ោង បន្ទាប់ពីប្រព័ន្ធផ្សព្វផ្សាយរដ្ឋរបស់ចិន បានអះអាងថា បុគ្គលិកនៅលើនាវា Sierra Madre «លើកកាំភ្លើងតម្រង់» ដាក់ CCG នៅថ្ងៃដដែលនោះ គឺថ្ងៃទី១៩ ខែឧសភា។

នៅក្នុងការបង្ហោះលើបណ្ដាញសង្គម កាលពីថ្ងៃអាទិត្យ (ទី២ ខែមិថុនា) ទូរទស្សន៍មជ្ឈិមចិន បាននិយាយថា យ៉ាងហោចណាស់បុរស ២នាក់ នៅលើនាវា ត្រូវបានគេឃើញកាន់កាំភ្លើង ដោយពួកគេលើកកាំភ្លើងតម្រង់ដាក់ CCG៕