ក្រុមអ្នកជំនាញរបស់អង្គការសហប្រជាជាតិ (UN) នៅថ្ងៃចន្ទ (ទី៣ ខែមិថុនា) នេះ បានអំពាវនាវឲ្យប្រទេសទាំងអស់ទទួលស្គាល់រដ្ឋប៉ាឡេស្ទីន ដើម្បីធានាសន្តិភាព នៅតំបន់មជ្ឈិមបូព៌ា។

ការអំពាវនាវនេះបានកើតឡើងក្នុងរយៈពេលមិនដល់មួយសប្តាហ៍នោះឡើយ បន្ទាប់ពីប្រទេសអេស្ប៉ាញ អៀរឡង់ និងន័រវ៉ែស បានទទួលស្គាល់ជាផ្លូវការនូវរដ្ឋប៉ាឡេស្ទីន ដែលការសម្រេចន៉បណ្តាលឲ្យមានការខឹងសម្បាពីអ៊ីស្រាអែល ដែលបានយល់ឃើញថា ខ្លួនឯងកាន់តែឯកោ បន្ទាប់ពីសង្គ្រាមផ្ទុះឡើងរយៈជិត ៨ខែ នៅតំបន់ហ្កាហ្សា។

បណ្ដាអ្នកជំនាញទាំងនោះ ដែលរួមមានទាំងអ្នករាយការណ៍ពិសេសរបស់ UN ទទួលបន្ទុកស្ថានភាពសិទ្ធិមនុស្សក្នុងដែនដីប៉ាឡេស្ទីនផងដែរ បាននិយាយថា ការទទួលស្គាល់រដ្ឋប៉ាឡេស្ទីន គឺជាការទទួលស្គាល់ដ៏សំខាន់នូវសិទ្ធិរបស់ប្រជាជនប៉ាឡេស្ទីន និងការតស៊ូរបស់ពួកគេ ឆ្ពោះទៅរកសេរីភាព និងឯករាជ្យភាព។

ពួកគេបាននិយាយថា៖ «នេះគឺជាលក្ខខណ្ឌមុន សម្រាប់សន្តិភាពយូរអង្វែង នៅប៉ាឡេស្ទីន និងតំបន់មជ្ឈិមបូព៌ាទាំងមូល ដោយចាប់ផ្តើមជាមួយនឹងការប្រកាសភ្លាមៗ អំពីបទឈប់បាញ់នៅតំបន់ហ្កាហ្សា និងមិនមានការលុកលុយយោធាបន្ថែមទៀតចូលទៅក្នុងទីក្រុង Rafah»។

ពួកគេបានបន្ថែមថា៖ «ដំណោះស្រាយរដ្ឋ២ នៅតែជាមាគ៌ាឯកភាពអន្តរជាតិតែមួយគាត់ ឆ្ពោះទៅរកសន្តិភាព និងសន្តិសុខ សម្រាប់ទាំងប៉ាឡេស្ទីន និងអ៊ីស្រាអែល និងជាផ្លូវចេញពីវដ្តនៃអំពើហិង្សា និងការស្អប់ខ្ពើមគ្នាពីមួយជំនាន់ទៅមួយជំនាន់»។

ពាក់ព័ន្ធនឹងការអំពាវនាវនេះ ក្រសួងការបរទេសអ៊ីស្រាអែលមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕