ពោធិ៍សាត់៖ ផ្សិតប៉ក់ ឬផ្សិតផូងផាំង គឺជាប្រភេទផ្សិតម្យ៉ាងដែលមានដុះជាហ្វូងតាមព្រៃភ្នំ ហើយ​ផ្សិតប្រភេទនេះ ខុសពីផ្សិតធម្មតាព្រោះវាដុះនៅក្នុងដី ដែលមានរាងមូលដូចពងក្រួច សម្រាប់​ខេត្តពោធិ៍សាត់ ផ្សិតប្រភេទនេះមានដុះច្រើននៅក្នុងភូមិសាស្ត្រស្រុកភ្នំក្រវាញ និងស្រុកវាលវែង ។

ផ្សិតប៉ក់ ឬផ្សិតផូងផាំងនេះ អាចយកទៅច្នៃធ្វើជាម្ហូបមានរស់ជាតិឆ្ងាញ់ពិសារ ហើយ​មាន​តម្រូវ​ការទីផ្សារទាំងក្នុងស្រុកនិងក្រៅស្រុក ដូចនេះឱ្យតែដល់រដូវមានផ្សិតប្រភេទនេះ តែងតែ​មាន​ឈ្មួញម​ក​ចាំប្រមូលទិញ ហើយប្រជាពលរដ្ឋជាច្រើនរយគ្រួសារ ដែលភាគច្រើន​មក​ពី​ស្រុក​ភ្នំ​ក្រវាញ ស្រុកតាលោសែនជ័យ និងស្រុកវាលវែង បានទៅស្វែងរុករក​ប្រមូល​ផល​ផ្សិត​នេះ​ពីតាម​តំបន់​ព្រៃភ្នំនានាក្នុងស្រុកភ្នំក្រវាញ និងស្រុកវាលវែង ដើម្បីលក់យកថវិកា​ផ្គត់ផ្គង់​ជីវភាព​បន្ថែម​ពី​លើ​ការងារ​ស្រែចំការ ។

បើតាមប្រជាពលរដ្ឋក្នុងស្រុកភ្នំក្រវាញ ដែលជាអ្នករកផ្សិតនេះលក់ បានឱ្យដឹងថា ក្នុង​ឆ្នាំ​២០២៤​នេះ ផ្សិតប៉ក់ឬផ្សិតផូងផាំងនេះមានដុះច្រើន ចំពោះតំលៃប្រៀបធៀបនិងឆ្នាំមុនៗគឺដូចគ្នា តែតម្លៃ​ផ្សិតប្រភេទ​នេះ​វាប្រែប្រួល​តាម​គុណភាព​គឺ​នៅដើម​រដូវ​ប្រមូល​ផល​ផ្សិត​នៅ​ខ្ចី​អាច​លក់​បាន​៦ម៉ឺន​រៀល​ក្នុង១គីឡូក្រាម ហើយនៅចុងរដូវប្រមូលផលដោយសារផ្សិតកាន់តែចាស់ទៅៗ ធ្វើឱ្យ​មាន​តម្លៃ​ថយចុះជាបន្តបន្ទាប់រហូតដល់ក្រោម១ម៉ឺនរៀលក្នុង១គីឡូក្រាម ។

គួរឱ្យដឹងដែរថា ផ្សិតប៉ក់ ឬផ្សិតផូងផាំង កើតចេញពីផេះផង់ នៃព្រៃ​ ឬ​រុក្ខជាតិ​ដែល​ត្រូវ​បាន​ភ្លើង​ឆេះ​ក្នុង​រដូវប្រាំង លុះត្រូវបានស្រោចស្រពដោយដំណក់ទឹកភ្លៀងក៏កើតចេញជាផ្សិតនេះឡើង មាន​ដុះ​តែម្តងគត់ក្នុងមួយឆ្នាំ គឺនៅដើមរដូវវស្សា ហើយ​ក្នុងឆ្នាំ២០២៤នេះនៅស្រុកភ្នំក្រវាញ និង​ស្រុកវាលវែងផ្សិតនេះ គឺមានដុះពីចុងខែមេសា រហូតដល់ដើមខែមិថុនា ហើយ​វា​នឹង​ចាយ​មក​លើ​ដី​ទាំង​អស់នៅពេលដែលមាន ភ្លៀងធ្លាក់ជោគជាំហើយនៅពេលនោះគឺគេលែងបរិភោគហើយ ៕ អត្ថបទ៖ ភិរុណ ពៅ