នៅសាលានគរបាលជាតិភូមិភាគ៥ ខេត្តបាត់ដំបង នៅព្រឹកថ្ងៃទី៤ខែមិថុនា ឆ្នាំ២០២៤ ឯកឧត្តម ឧត្ដមសនីយ៍ឯក សុន វុឌ្ឍី អនុប្រធានបណ្ឌិតសភានគរបាលកម្ពុជា តំណាង​ឯកឧត្ដម នាយឧត្ដមសនីយ៍​សាស្រ្តចារ្យ​ ឯក មនោសែន ប្រធានបណ្ឌិតសភានគរបាលកម្ពុជា បានអញ្ជើញ​ជាអធិបតី​ក្នុង​ពិធី​បិទ​វគ្គ​បណ្ដុះ​បណ្ដាលកម្រិតបឋមវិជ្ជាជីវៈនគរបាល ជំនាន់ទី១៨ លើកទី១ ដល់សិស្ស​នគរបាល​ជ័យលាភី​សរុប​១៩០នាក់។

ជាកិច្ចចាប់ផ្ដើមនៃពិធីបិទវគ្គនេះ លោកវរសនីយ៍ឯក ឈួន សុវណ្ណារ័ត្ន នាយកសាលា បាន​ថ្លែង​សន្ទរកថា​ស្វាគមន៍ និង​រាយការណ៍​សង្ខេប​អំពី​លទ្ធផល នៃ​ការ​បណ្ដុះ​បណ្ដាល​ជូន​សិស្ស​នគរបាល​ប្រកប​ដោយ​ភាព​ជោគជ័យ​នា​ពេលកន្លងទៅ។

ថ្លែងក្នុងពិធីឯកឧត្ដមឧត្ដមសនីយ៍ឯក បានថ្លែងថា ក្រសួងមហាផ្ទៃបាន​យក​ចិត្ត​ទុក​ដាក់ និង​ផ្ដល់​អាទិភាព​ខ្ពស់​ដល់ការអប់រំបណ្ដុះបណ្ដាល ព្រមទាំងដាក់ចេញ​ផែនការ​កំណត់​កំណែ​ទម្រង់​លើ​កងកម្លាំង​នគរបាល​ជាប់​ជាប្រចាំ ស្របតាមគោលនយោបាយរបស់រាជរដ្ឋាភិបាល ដោយផ្ដោតសំខាន់​ទៅ​លើ​ការ​ធ្វើ​ទំនើប​កម្ម និងការពង្រឹងសមត្ថភាពវិជ្ជាជីវៈនៃកងកម្លាំងនគរបាលជាតិ ឪ្យស្របទៅ​នឹង​ការ​វិវត្ត​នៃ​ស្ថាន​ការណ៍​សន្តិសុខជាតិ និងអន្តរជាតិ ព្រមទាំងឆ្លើយតបតម្រូវការនៃអង្គភាពនគរបាលជាតិផងដែរ។

ទន្ទឹមនេះដែរ ឯកឧត្តមឧត្ដមសនីយ៍ឯក បានថ្លែងការកោត​សរសើរ​ចំពោះ​វឌ្ឍនភាព​យ៉ាង​ឆាប់​រហ័ស​គួរ​ឲ្យ​កត់​សម្គាល់របស់សាលានគរបាលភូមិភាគ៥ ដើម្បីឆ្លើយតបនឹងតម្រូវការនៃការបណ្តុះបណ្ដាល ក្នុងយុគ​សម័យ​នៃ​សន្តិភាព និងប្រទេសជាតិកំពុងមានការរីកចម្រើនលើគ្រប់វិស័យ ដើម្បីបំពេញ​បាន​តាម​តម្រូវ​ការ​នៃ​ការ​បណ្ដុះបណ្ដាលប្រកបដោយគុណភាព ក្នុងបំណងព​ង្រឹង​សមត្ថភាព​ជំនាញ និង​លើក​កម្ពស់​ការ​គោរព​ក្រម​សីលធម៌វិជ្ជាជីវៈរបស់កង​កម្លាំងនគរបាលជាតិកាន់តែល្អប្រសើរ ស្របតាមកម្មវិធីនយោបាយ និង​យុទ្ធសាស្រ្ត​បញ្ចកោណរបស់រាជរដ្ឋាភិបាលនីតិកាលទី៧ ក្រោមការដឹកនាំដ៏ឈ្លាសវៃ ទស្សន​វិស័យ​ជឿន​លឿនរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

ឯកឧត្តមបានកោតសរសើរដល់កងកម្លាំងនគរបាលកម្ពុជា ដែលខិតខំសិក្សាហ្វឹកហាត់ គោរ​ព​វិន័យ​របស់​សាលា​បានល្អ រហូតទទួលលបានជោគជ័យ ហើយត្រូវយកចំណេះដឹង​ជំនាញ​ដែល​ទទួល​បាន​ក្នុង​ការ​សិក្សា​​នេះ​​ទៅ​ប្រើប្រាស់ឲ្យ​មានប្រយោជន៍សំរាប់ជាតិនិងប្រជាជន ព្រម​ទាំង​អរគុណ​ដល់​សប្បុរស​ជន​ទាំងអស់​បាន​ចូលរួមចំណែកជាមួយក្រសួងមហាផ្ទៃ ក្នុងការអភិវឌ្ឍបណ្ឌិត​សភា​នគរបាល​ជាតិ​ភូមិ​ភាគ៥​ខេត្ត​បាត់ដំបង​នេះ។

ជាទីបញ្ចប់ក្នុងឱកាសបិទវគ្គនេះ ឯកឧត្ដមឧត្ដមសនីយឯក បានផ្ដល់កិត្តិយស​ប្រគល់​វិញ្ញាបន​បត្រ​ជូន​ដល់​សិស្ស​នគរបាលជ័យលាភីជានិមិត្តរូបចំនួន២០នាក់ផងដែរ៕ អត្ថបទ ពេញ សុភ័ក្រ្ត