កងកម្លាំងអ៊ុយក្រែន បានអះអាងកាលពីថ្ងៃចន្ទថា ពួកគេ បានបាញ់ដោយជោគជ័យទៅលើប្រព័ន្ធមីស៊ីល S-300 របស់រុស្ស៊ី ដោយប្រើអាវុធដែលផ្គត់ផ្គង់ដោយលោកខាងលិច នៅក្នុងទឹកដីរុស្ស៊ី។

រដ្ឋមន្ត្រីរដ្ឋាភិបាលអ៊ុយក្រែន Iryna Vereshchuk បានបង្ហោះនៅលើហ្វេសប៊ុករួមជាមួយនឹងរូបភាពដែលបង្ហាញពីការវាយប្រហារ៖«ការវាយប្រហារ បានបង្កឲ្យអគ្គិភ័យឆេះយ៉ាងសន្ធោសន្ធៅ។ នោះ គឺជាប្រព័ន្ធ ការពារដែនអាកាស S-300 របស់រុស្ស៊ី នៅលើទឹកដីរុស្ស៊ី។ ប៉ុន្មានថ្ងៃដំបូងបន្ទាប់ពីការអនុញ្ញាតឲ្យប្រើប្រាស់អាវុធលោកខាងលិច នៅលើទឹកដីសត្រូវ»។

ការវាយប្រហារនេះដែរ កើតឡើង ត្រឹមតែប៉ុន្មានថ្ងៃបន្ទាប់ពីប្រធានាធិបតីអាមេរិកលោក ចូ បៃដិន បាន ផ្តល់ការអនុញ្ញាតឲ្យអ៊ុយក្រែន ធ្វើការវាយប្រហារដែលមានកំណត់ ដោយប្រើអាវុធអាមេរិក នៅក្នុងទឹកដី រុស្ស៊ីជុំវិញទីក្រុងខាគីវ បន្ទាប់ពីប្រទេសអឺរ៉ុបមួយចំនួន បានលុបចោលការរឹតបន្តឹងអំពីរបៀបប្រើប្រាស់អាវុធ អាចត្រូវបានប្រើប្រាស់។

ទោះបីជាយ៉ាងណាក៏ដោយ ពុំទាន់ច្បាស់ថាតើអាវុធដែលប្រើក្នុងការវាយប្រហារដែលពិពណ៌នាដោយ លោក Vereshchuk ត្រូវបានផ្គត់ផ្គង់ដោយសហរដ្ឋអាមេរិក ឬយ៉ាងណានោះទេ។

ប្រធានាធិបតីអ៊ុយក្រែនលោក វ្ល៉ូឌីមី ហ្ស៊េឡិនស្គី (Volodymyr Zelensky) បានសរសើរការសម្រេចចិត្តរបស់លោក បៃដិណ ក្នុងការអនុញ្ញាតឲ្យមានការវាយប្រហារមួយចំនួន នៅក្នុងទឹកដីរុស្ស៊ីថា ជា «ការបោះជំហានទៅមុខ» ដែលនឹងជួយកងកម្លាំងរបស់លោកការពារតំបន់ខាគីវដែលកំពុងរងការវាយប្រហារពីរុស្ស៊ី ទោះបីជាអ្នកវិភាគមួយចំនួន បានចោទសួរថាតើសេរីភាពថ្មី នឹងពង្រឹងសមត្ថភាពរបស់អ៊ុយក្រែន ក្នុងការទប់ទល់ការឈ្លានពានរបស់រុស្ស៊ីដែរឬទេ?