ប្រជាជនប៉ាឡេស្ទីនដែលបានត្រឡប់ទៅជំរំជនភៀសខ្លួន Jabalia នៅតំបន់ហ្សាហ្កាភាគខាងជើង ក្នុង រយៈពេលប៉ុន្មានថ្ងៃថ្មីៗនេះ បានសម្តែងការភ្ញាក់ផ្អើលចំពោះកម្រិតនៃការបំផ្លិចបំផ្លាញ បន្ទាប់ពីប្រតិបត្តិការយោធាអ៊ីស្រាអែលរយៈពេលបីសប្តាហ៍នៅទីនោះ ប្រឆាំងនឹងក្រុមហាម៉ាសនិងក្រុមប្រដាប់អាវុធប៉ាឡេស្ទីនផ្សេងទៀត។

បុរសភៀសខ្លួនម្នាក់ ដែលស្ថិតក្នុងចំណោមមនុស្សជាង ៦០.000នាក់ ដែលបានភៀសខ្លួនពីការប្រយុទ្ធ ដ៏ខ្លាំងក្លា និងការវាយប្រហារនៅក្នុងជំរំ និងតំបន់ជុំវិញនោះ កាលពីខែមុន បាននិយាយថា ខ្លួនបានឃើញ «ទិដ្ឋភាពដ៏គួរឲ្យរន្ធត់»។

លោកបានប្រាប់សារព័ត៌មាន BBCថា៖«សូម្បីតែខ្សាច់នៅក្រោមជើងរបស់យើង ក៏ឆេះដែរ។ វាមិនអាចទ្រាំទ្រ បានក្នុងការដើរទៅមុខនោះទេ» ។ លោកបានបន្តថា៖ «តាមដងផ្លូវពោរពេញទៅដោយកម្ទេចថ្ម និងអគារដែលត្រូវបានគេបំផ្លាញ។ ពុំមានពាក្យសម្តីណា អាចពិពណ៌នាអំពីការបំផ្លិចបំផ្លាញទាំងនោះបានទេ»។

បុរសម្នាក់ដែលសុំមិនបញ្ចេញឈ្មោះ ក៏បាននិយាយថា ខ្លួនបានឃើញអ្នករងរបួស និងស្លាប់ដេកលើដី ហើយថា សេវាកម្មសំខាន់ៗ និងទំនិញផ្សេងៗ មិនអាចរកទិញបានឡើយ។

លោកបានបន្ថែមថា៖ «មិនមានអគ្គិសនី ឬទឹកប្រើប្រាស់ទេ គ្មានគ្លីនិក ឬថ្នាំព្យាបាលទេ»។ «អណ្តូងទឹកទាំង ត្រូវបានបំផ្លាញ ហាងលក់ទំនិញ និងផ្សារទំនើប ក៏ត្រូវបានបំផ្លាញគ្មានសល់ ហើយមានការខ្វះខាតស្បៀងអាហារយ៉ាងខ្លាំង»។

ទីក្រុងJabalia និងជំរំជនភៀសខ្លួន ក្នុងទីក្រុងដែលមានអាយុកាលរាប់ទសវត្សរ៍ ជាទីក្រុងធំជាងគេបំផុតនៅតំបន់ហ្កាហ្សា ដោយមានអ្នកស្រុកប្រមាណជាង ១១0.០០០នាក់ បានឃើញការបំផ្លិចបំផ្លាញ និងការប្រយុទ្ធគ្នាជាច្រើនសប្តាហ៍ បន្ទាប់ពីការចាប់ផ្តើមនៃសង្រ្គាមរវាងអ៊ីស្រាអែល និងក្រុមហាម៉ាស ក្នុងខែតុលា។