របបសឹកមីយ៉ាន់ម៉ា កំពុងធ្វើការបង្រ្កាបលើអ្នកជួញដូរមាស និងប្តូរប្រាក់បរទេស ព្រមទាំងភ្នាក់ងារលក់អចលនទ្រព្យបរទេស ដោយមានការចាប់ខ្លួនចំនួន ៣៥ នាក់ ត្រូវបានប្រកាសក្នុងរយៈពេលពីរថ្ងៃចុងក្រោយនេះ ដែលជាផ្នែកនៃកិច្ចខិតខំប្រឹងប្រែងដើម្បីរក្សាស្ថិរភាពរូបិយប័ណ្ណ ដែលកំពុងធ្លាក់ចុះយ៉ាងឆាប់រហ័ស។

ប្រព័ន្ធផ្សព្វផ្សាយរដ្ឋបាននិយាយថា មនុស្សទាំងនេះរួមមានអ្នកដែលត្រូវបានចោទប្រកាន់ពីបទលក់ខុនដូខុសច្បាប់នៅក្នុងប្រទេសថៃ និងអ្នកដែលត្រូវបានចាប់ខ្លួនពីបទចោទប្រកាន់ថាបានធ្វើឱ្យមានអស្ថិរភាពនៃអត្រាប្តូរប្រាក់រូបិយប័ណ្ណបរទេស។ រូបិយប័ណ្ណចាត់ (Kyat) ឡើងដល់កម្រិតទាបបំផុតកាលពីសប្តាហ៍មុន ដោយបានធ្លាក់ចុះមកនៅត្រឹមប្រហែល ៤.៥០០ ចាត់មួយដុល្លារនៅលើទីផ្សារងងឹត នេះបើយោងតាមពាណិជ្ជករប្តូរប្រាក់បរទេសប្រាំនាក់។

អត្រាទីផ្សារងងឹតសម្រាប់ប្រាក់ដុល្លារជាច្រើនឆ្នាំមកនេះ គឺខ្ពស់ជាងអត្រាយោងរបស់ធនាគារកណ្តាលមីយ៉ាន់ម៉ា ដែលបច្ចុប្បន្នបានកំណត់នៅតម្លៃ ២.១០០ ចាត់ប៉ុណ្ណោះក្នុងមួយដុល្លារ។ សេដ្ឋកិច្ចមីយ៉ាន់ម៉ា ដែលមានភាពផុយស្រួយរួចទៅហើយបន្ទាប់ពីការគ្រប់គ្រងដោយយោធាជាច្រើនទសវត្សរ៍ និងជំងឺរាតត្បាតកូវីដ១៩ នេះ កាន់តែតានតឹងចាប់តាំងពីរដ្ឋប្រហារមក ជាមួយនឹងការវិនិយោគបរទេសបានធ្លាក់ចុះ និងទណ្ឌកម្មរបស់លោកខាងលិច។

ប្រទេសក្រីក្រនៅអាស៊ីអាគ្នេយ៍ ដែលមានប្រជាជនប្រហែល ៥៥ លាននាក់មួយនេះ បានស្ថិតក្នុងភាពចលាចលនយោបាយ និងសេដ្ឋកិច្ចចាប់តាំងពីរដ្ឋប្រហារឆ្នាំ២០២១ នៅពេលដែលយោធាបានបណ្តេញរដ្ឋាភិបាលស៊ីវិលជាប់ឆ្នោត បន្ទាប់ពីមួយទសវត្សរ៍នៃលទ្ធិប្រជាធិបតេយ្យ និងកំណែទម្រង់សេដ្ឋកិច្ច៕