ក្រុមប្រដាប់អាវុធនិកាយស៊ីអ៊ីតដែលគាំទ្រដោយអ៊ីរ៉ង់ នៅក្នុងប្រទេសអ៊ីរ៉ាក់ បានបង្កើនការវាយប្រហារដោយគ្រាប់រ៉ុក្កែត និងមីស៊ីល ទៅលើអ៊ីស្រាអែល ក្នុងប៉ុន្មានសប្តាហ៍ថ្មីៗនេះ ដោយបង្កើនការព្រួយបារម្ភនៅក្នុងទីក្រុងវ៉ាស៊ីនតោន និងក្នុងចំណោមសម្ព័ន្ធមិត្តអ៊ីរ៉ង់មួយចំនួនអំពីការសងសឹករបស់អ៊ីស្រាអែលដែលអាចកើតឡើង និងការកើនឡើងភាពតានតឹងក្នុងតំបន់ ប្រសិនបើពួកគេ បង្កឲ្យមានការបង្ហូរឈាម។

ទោះបីជាការវាយប្រហារជាញឹកញាប់ពីចម្ងាយរាប់រយម៉ាយ (គីឡូម៉ែត្រ) មិនត្រូវបានមើលឃើញ ដោយមន្ត្រីលោកខាងលិច និងអ្នកជំនាញអ៊ីស្រាអែលថា ជាការគំរាមកំហែងកម្រិតដូចគ្នាចំពោះអ៊ីស្រាអែលដូចការវាយប្រហារដោយក្រុមហាម៉ាស និងក្រុមហេសបូឡាក៏ដោយ ពួកគេ បានបង្កើនចំនួននិងធ្វើឲ្យកាន់តែ មានភាពស្មុកស្មាញ។

យ៉ាងហោចណាស់រ៉ុក្កែតចំនួនពីរគ្រាប់ បានត្រូវចំគោលដៅរបស់ពួកគេ ហើយជាច្រើនគ្រាប់ផ្សេងទៀត ត្រូវបាញ់ទម្លាក់ដោយប្រព័ន្ធការការពាររបស់សហរដ្ឋអាមេរិកនិងអ៊ីស្រាអែល។ នេះបើយោងតាមមន្ត្រីសហរដ្ឋអាមេរិក និងសេចក្តីថ្លែងការណ៍ជាសាធារណៈដោយយោធាអ៊ីស្រាអែល។

សព្វាវុធថ្មីៗដូចជា មីស៊ីលតម្រង់គោលដៅ ត្រូវបានប្រើប្រាស់ជាប្រចាំ ចាប់តាំងពីខែឧសភា ហើយកាន់តេមានការពិបាកសម្រាប់ប្រព័ន្ធការពារដែនអាកាស ក្នុងការកម្ទេច។

លោក Mike Knights ជាសាស្ត្រាចារ្យនៅវិទ្យាស្ថានគោលនយោបាយដើមបូព៌ា ដែលមានមូលដ្ឋាននៅសហរដ្ឋអាមេរិក ជាទីដែលលោកតាមដានការវាយប្រហារ បាននិយាយថា៖«សរុបមក កម្រិតនៃកម្លាំង និងប្រភេទនៃប្រព័ន្ធសព្វាវុធដែលបានប្រើប្រាស់ បានកើនឡើងយ៉ាងខ្លាំង»។ លោកបានបន្តថា៖ «វាធ្វើឲ្យ   ស្មុកស្មាញដល់កិច្ចការរបស់អ៊ីស្រាអែល ហើយជាការបង្កើនការចំណាយផ្នែកហិរញ្ញវត្ថុ»។