ភ្នំពេញ ៖ ក្រោយមានការរិះគន់ពីបងប្អូនប្រជាពលរដ្ឋនៅក្បែរសំណង់មួយកន្លែង ដែលស្ថិតនៅភូមិរកា សង្កាត់ចក្រអង្រែលើ ខណ្ឌមាន​ជ័យ​រាជធានីភ្នំពេញ បានសាងសង់ចូលច្រាំងទន្លេហើយរំលោភចូលដីអ្នកជិតខាងផងនោះ ចៅសង្កាត់ចក្រអង្រែលើ លោក ជា សុខៃ បាន​ហៅម្ចាស់សំណង់ណែនាំ ហើយបញ្ជាឲ្យផ្អាកការសាងសង់របស់ខ្លួនជាបន្ទាន់ ប្រសិនបើនៅបន្តសាងសង់​ទៀតនឹងធ្វើការរុះរើ​ដោយគ្មាន​លក្ខខណ្ឌនោះឡើយ។

ថ្លែងប្រាប់ទូរទស្សន៍BTVតាមរយៈទូរស័ព្ទនារសៀលថ្ងៃទី១០ ខែសីហា ឆ្នាំ២០២១នេះលោក ជា សុខៃ បានបញ្ជាក់ថា ការសាងសង់នូវ​សំណង់​ដែលបងប្អូនប្រជាពលរដ្ឋនៅក្បែរនោះបានប្តឹងមកសង្កាត់នោះគឺជាការសាងសង់សំណង់ដើម្បីទប់ច្រាំងទន្លេទេ ហើយប្រសិន​បើសាងសង់​បន្ថែមលើសពីនេះអាជ្ញាធរនឹងធ្វើការរុះរើចេញស្របទៅតាមច្បាប់។

បើទោះបីជាមានការអះអាងពីលោកចៅសង្កាត់ចក្រអង្រែលើយ៉ាងនេះក្តី ក៏បងប្អូនប្រជាពលរដ្ឋនៅតែឃើញ​ម្ចាស់សំណង់​នេះបន្តសាងសង់​ដដែល ដោយគ្មានការស្តាប់បង្គាប់តាមការណែនាំរបស់អាជ្ញាធរឡើយ ហើយជាងនេះទៅទៀត​គេសង្កេតឃើញសំណង់​នេះកាន់តែពន្លឿនការ​សាងសង់​​របស់ខ្លួនជាងមុនទៅទៀតនោះ។

ជាមួយគ្នានោះដែរ បងប្អូនប្រជាពលរដ្ឋនៅក្បែរនោះបានធ្វើការអំពាវនាវដល់ថ្នាក់លើ ជាពិសេសឯកឧត្តម ឃួង ស្រេងអភិបាល​គណៈអភិបាល​រាជធានីភ្នំពេញ​ចាត់មន្រ្តីជំនាញឲ្យចុះត្រួតពិនិត្យនូវសំណង់នេះថាតើវាស្របច្បាប់ឬយ៉ាងណានោះខណៈការសាងសង់កាន់តែធំទៅៗ​រំលោភលើ​ច្រាំង​ទន្លេរបស់រដ្ឋ និងដីប្រជាពលរដ្ឋនៅក្បែរនោះផង។

បើតាមបងប្អូនប្រជាពលរដ្ឋរស់នៅភូមិ ទូលរកា សង្កាត់ចក្រអង្រែក្រោមនោះបានអះអាងថា តំណាងម្ចាស់សំណង់នេះគឺមានឈ្មោះ ហាក់ ងួនឈៀង៕អត្ថបទ ៖ ចក់