មេដឹកនាំកោះតៃវ៉ាន់ លោក Lai Ching-te នៅថ្ងៃអង្គារ (ទី៤ ខែមិថុនា) នេះ បាននិយាយថា លោកនឹងប្រឹងប្រែង ដើម្បីធ្វើឲ្យមានការចងចាំជាប្រវត្តិសាស្ត្ររៀងរហូត និងដើម្បីបានទៅដល់មនុស្សគ្រប់គ្នា ដែលយកចិត្តទុកដាក់ ចំពោះលទ្ធិប្រជាធិបតេយ្យរបស់ចិន អំឡុងខួបលើកទី៣៥ នៃការបង្ក្រាបនៅទីលានធានអានមេន ក្នុងទីក្រុងប៉េកាំងឆ្នាំ១៩៨៩។

សូមរំលឹកថា ព្រឹត្តិការណ៍ទាំងនៅលើ និងជុំវិញទីលាន នាកណ្តាលទីក្រុងប៉េកាំង កាលថ្ងៃទី៤ ខែមិថុនា ឆ្នាំ១៩៨៩ នៅពេលដែលកងទ័ពចិន បានបើកការបាញ់ប្រហារ ដើម្បីបញ្ឈប់បាតុកម្មគាំទ្រលទ្ធិប្រជាធិបតេយ្យ ដែលដឹកនាំដោយនិស្សិត គឺជាប្រធានបទហាមឃាត់ នៅក្នុងប្រទេសចិន ហើយខួបនេះមិនត្រូវបានអនុញ្ញាតឲ្យប្រារព្ធ ឬពិភាក្សាជាសាធារណៈនោះទេ។

តែការរំលឹខួបនេះជាសាធារណៈ ឥឡូវនេះ ត្រូវបានធ្វើឡើងនៅក្នុងទីក្រុងក្រៅប្រទេស ក្នុងនោះរួមទាំងទីក្រុងតៃប៉ិ ដែលពេលខ្លះបណ្ដាមេដឹកនាំជាន់ខ្ពស់របស់រដ្ឋបាលកោះតៃវ៉ាន់ ប្រើខួបនេះរិះគន់ប្រទេសចិន និងជំរុញឲ្យប្រទេសនេះប្រឈមមុខនឹងអ្វីដែលខ្លួនបានធ្វើ។

តាមរយៈការបង្ហោះនៅលើបណ្ដាញសង្គម Facebook លោក Lai បានលើកឡើងថា វាជារឿងសំខាន់ក្នុងការឆ្លើយតបទៅនឹងរបបផ្តាច់ការដោយការទាមទារសេរីភាព ហើយថា ការចងចាំពីថ្ងៃទី៤ ខែមិថុនា នឹងគ្មានថ្ងៃរលាយបាត់ជាដាច់ខាត។ លោក Lai បានសរសេររៀបរាប់ថា៖ «ហេតុកាណ៍នេះ រំឭកយើងថា លទ្ធិប្រជាធិបតេយ្យ និងសេរីភាព មិនមែនបានមកដោយងាយៗនោះឡើយ ហើយថា យើងត្រូវតែសាងនូវភាពស្រុះស្រួលគ្នាជាមួយនឹងលទ្ធិប្រជាធិបតេយ្យ ហើយឆ្លើយតបទៅនឹងលទ្ធិផ្តាច់ការដោយការទាមទារសេរីភាព»។

លោក Lai បានរៀបរាប់បន្ថែមថា៖ «ការចងចាំពីថ្ងៃទី៤ ខែមិថុនា នឹងមិនរលាយបាត់ពីប្រវត្តិសាស្ត្រនោះទេ។ យើងនឹងបន្តប្រឹងប្រែង ដើម្បីធ្វើឲ្យការចងចាំជាប្រវត្តិសាស្ត្រនេះស្ថិតស្ថេរជារៀងរហូត និងជួយជំរុញដល់អ្នកគ្រប់គ្នាដែលខ្វល់ខ្វាយពីលទ្ធិប្រជាធិបតេយ្យរបស់ចិន»។

សូមបញ្ជាក់ថា ប្រទេសចិនមិនពេញចិត្តចំពោះលោក Lai នោះទេ ហើយហៅរូបលោកថា ជា «អ្នកបំបែកខ្លួន»។ កាលពីខែមុន ប្រទេសចិនបានធ្វើសមយុទ្ធ ជុំវិញកោះតៃវ៉ាន់ ជាអ្វីដែលខ្លួនបាននិយាយថា ជាការដាក់ទណ្ឌកម្ម ចំពោះការបំបែកខ្លួនរបស់លោក Lai៕