ប្រធានាធិបតីសហរដ្ឋអាមេរិក លោក Joe Biden កាលពីថ្ងៃចន្ទ (ទី៣ ខែមិថុនា) បានហៅអ្នកកាន់តំណែងមុនរបស់លោក គឺលោក Donald Trump ថា ជា «ឧក្រិដ្ឋជនត្រូវបានផ្ដន្ទាទោស» ដែលកំពុងស្វែងរកតំណែងប្រធានាធិបតីជាលើកដំបូង ក្នុងប្រវត្តិសាស្ត្រអាមេរិក។

គួរបញ្ជាក់ថា Trump បានក្លាយជាអតីតប្រធានាធិបតីអាមេរិកដំបូងគេ ដែលត្រូវបានកាត់ទោសពីបទឧក្រិដ្ឋ កាលពីសប្តាហ៍មុន នៅពេលដែលគណៈវិនិច្ឆ័យ នៅទីក្រុងញូវយ៉ក បានរកឃើញថា លោកមានទោសពីបទក្លែងបន្លំឯកសារ ដើម្បីបិទបាំងការបង់ប្រាក់បំបិទមាត់ដល់តារាអាសអាភាស នៅមុនការបោះឆ្នោតឆ្នាំ២០១៦។

អំឡុងពេលជួបជាមួយម្ចាស់ជំនួយមួយក្រុមតូច ក្នុងកម្មវិធីរៃអង្គាសថវិកា នៅទីក្រុង Greenwich រដ្ឋ Connecticut លោក Biden បានប្រាប់ថា៖ «នេះគឺជាលើកដំបូងក្នុងប្រវត្តិសាស្ត្រអាមេរិក ដែលអតីតប្រធានាធិបតីជាឧក្រិដ្ឋជនត្រូវបានផ្ដន្ទាទោស កំពុងស្វែងរកតំណែងប្រធានាធិបតី»។ ហើយលោកបាននិយាយថា ការវាយប្រហាររបស់លោក Trump មកលើប្រព័ន្ធយុត្តិធម៌របស់សហរដ្ឋអាមេរិក គឺជា «ការខូចខាតកាន់តែខ្លាំងបន្ថែមទៀត»។

ការអត្ថាធិប្បាយរបស់លោកប្រធានាធិបតី ផ្តល់នូវការយល់ឃើញពីរបៀបដែលលោក និងយុទ្ធនាការរបស់លោកអាចប្រើប្រាស់ការផ្តន្ទាទោសលើលោក Trump ដើម្បីបង្ហាញដល់អ្នកបោះឆ្នោតថា លោក Trump មិនស័ក្តិសមសម្រាប់ការកាន់តំណែងនោះឡើយ ពោលគឺជាបញ្ហាដែលអាចជួយកំណត់ការប្រកួតប្រជែងតំណែងប្រធានាធិបតីនៅឆ្នាំនេះ តាមរយៈការរុញឧក្រិដ្ឋកម្មរបស់លោក Trump ឲ្យទៅជាចំណុចសំខាន់នៃការបោះឆ្នោត។

ពាក់ព័ន្ធនឹងការអត្ថាធិប្បាយនេះ អ្នកនាំពាក្យយុទ្ធនាការរបស់លោក Trump បាននិយាយតាមរយៈប្រព័ន្ធផ្សព្វផ្សាយ Fox News ថា វាគឺជា «រឿងអាម៉ាស់មួយ» សម្រាប់យុទ្ធនាការរបស់លោក Biden ក្នុងការហៅលោក Trump ថា ជា «ឧក្រិដ្ឋជនត្រូវបានផ្តន្ទាទោស»។ សម្រាប់លោក Trump កាលថ្ងៃចន្ទ (ទី៣ ខែមិថុនា) លោកបាននិយាយថា លោកនឹងទទួលយកការឃុំឃាំងនៅក្នុងផ្ទះ ឬការជាប់ពន្ធនាគារ បន្ទាប់ពីមានការកាត់ទោសជាប្រវត្តិសាស្ត្រនេះ ប៉ុន្តែបន្ថែមថា សាធារណជននឹងពិបាកទទួលយកករណីនេះ៕