ប្រធានាធិបតីប្រទេសកូរ៉េខាងត្បូង លោក យូន ស៊ុក យុល(Yoon Suk Yeol) បាននិយាយនៅថ្ងៃអង្គារទីនេះថា ប្រទេសរបស់លោក នឹងបង្កើនកិច្ចសហប្រតិបត្តិការជាមួយបណ្តាប្រទេសនៅទ្វីបអាហ្រ្វិក ដើម្បីធានាបាននូវស្ថិរភាពនៃការផ្គត់ផ្គង់រ៉ែសំខាន់ៗ និងបង្កើនល្បឿនការចរចា ដើម្បីជំរុញភាពជាដៃគូសេដ្ឋកិច្ច និងពាណិជ្ជកម្ម។

ដោយធ្វើជាម្ចាស់ផ្ទះនៃកិច្ចប្រជុំកំពូលលើកដំបូងមិនធ្លាប់មាន ជាមួយមេដឹកនាំប្រទេសអាហ្វ្រិកចំនួន៤៨ប្រទេស លោក Yoon បាននិយាយថា កូរ៉េខាងត្បូងនឹងបង្កើនជំនួយអភិវឌ្ឍន៍សម្រាប់ទ្វីបអាហ្រ្វិកដល់១០ពាន់លានដុល្លារ ក្នុងរយៈពេល៦ឆ្នាំខាងមុខ ខណៈប្រទេសនេះ សម្លឹងមើលការប្រើប្រាស់ធនធានរ៉ែដ៏សម្បូរបែបរបស់ទ្វីបអាហ្វ្រិក និងសក្តានុពល ដែលជាទីផ្សារនាំចេញដ៏ធំ។

លោក Yoon បានសន្យាផ្តល់ហិរញ្ញប្បទាននាំចេញចំនួន១៤ពាន់លានដុល្លារផងដែរ ដើម្បីជំរុញវិស័យពាណិជ្ជកម្ម និងការវិនិយោគ សម្រាប់ក្រុមហ៊ុនរបស់កូរ៉េខាងត្បូង នៅក្នុងបណ្តាប្រទេសនៅអាហ្វ្រិក។

យ៉ាងហោចណាស់ប្រមុខរដ្ឋចំនួន ៣០រូប កំពុងចូលរួមក្នុងកិច្ចប្រជុំកំពូលនេះ ដោយមានគណៈប្រតិភូមកពី៤៨ប្រទេសចូលរួម។ ការិយាល័យប្រធានាធិបតី និយាយថា លោក Yoon និងប្រធានសហភាពអាហ្រ្វិក លោក ម៉ូហាម៉េដ អ៊ូល ហ្កាហ្ស៊ូអានី(Mohamed Ould Ghazouani) នឹងកំណត់ពេលចេញសេចក្តីថ្លែងការណ៍រួមមួយ។