តំបន់មួយ ដែលស្ថិតក្នុងចំណោមតំបន់ទេសចរណ៍ដ៏ពេញនិយមបំផុតរបស់ទីក្រុងតូក្យូ កំពុងចាត់វិធានទប់ស្កាត់ការមានអាកប្បកិរិយាមិនល្អ ដោយការឲ្យបរិភោគសុរា នៅតែខាងក្នុងទីកន្លែងដែលមិនមែនជាទីហាលវាល ពោលគឺខាងក្នុងអាគារ ឬគេហដ្ឋាន។

វិធានការនេះ ដែលត្រូវបានគេរំពឹងថា នឹងចូលជាធរមានក្នុងខែតុលានោះ នឹងឃើញនូវហាមឃាត់ការផឹកស្រា នៅតាមដងផ្លូវ ឬទីសាធារណៈនានា ក្នុងតំបន់ Shibuya ចាប់ពីម៉ោង ៦ល្ងាចដល់ម៉ោង ៥ព្រឹក ជារៀងរាល់ថ្ងៃ។ សូមបញ្ជាក់ថា អាយុផឹកស្រាស្របច្បាប់ នៅប្រទេសជប៉ុន គឺ ២០ឆ្នាំ។

Shibuya ដែលជាតំបន់ស្វ័យគ្រប់គ្រង នៅក្នុងទីក្រុងតូក្យូ អាចបង្កើតបទប្បញ្ញត្តិក្នុងស្រុករបស់ខ្លួន។ អភិបាលតំបន់ លោក Ken Hasebe ថ្មីៗនេះ បានប្រាប់អ្នកសារព័ត៌មានថា៖ «យើងបានបង្កើនការល្បាត និងកិច្ចប្រឹងប្រែងផ្សេងទៀតកាលពីឆ្នាំមុន ប៉ុន្តែយើងបានឮមនុស្សនិយាយថា មែនហើយ ច្បាប់ចែងថា អ្នកអាចផឹកស្រាបាន មិនអ៊ីចឹងឬ? តាមរយៈការបង្កើតច្បាប់នេះ យើងចង់បង្ហាញពីចេតនារបស់តំបន់ ក្នុងនោះរួមទាំងអំឡុងពេលដើរល្បាតផងដែរ យើងចង់ឲ្យមនុស្សម្នាផឹកភេសជ្ជៈរបស់ពួកគេ នៅតែខាងក្នុងភោជនីយដ្ឋាន»។

យ៉ាងណាក្ដី ដំណឹងនេះប្រហែលជាមិនបង្កការភ្ញាក់ផ្អើលដល់អ្នកស្រុកនោះទេ។ កាលពីរដូវស្លឹកឈើជ្រុះឆ្នាំមុន តំបន់ Shibuya នេះ បានហាមឃាត់សកម្មភាពទាំងឡាយដែលទាក់ទងនឹងពិធីបុណ្យ Halloween នៅក្នុងតំបន់ ដោយភេសជ្ជៈមានជាតិអាល់កុលត្រូវបានលើកឡើងថា ជាហេតុផលចម្បងនៅពីក្រោយការហាមឃាត់នេះ។ ចំណាត់ការនោះ រួមបញ្ចូលទាំងការហាមប្រាមមិនឲ្យផឹកស្រានៅខាងក្រៅបារ និងភោជនីយដ្ឋានផងដែរ។ លោក Hasebe បាននិយាយថា ក្រុមហ៊ុនមូលដ្ឋានបានគាំទ្របទប្បញ្ញត្តិ នៅក្នុងខែតុលា ឆ្នាំ២០២៣ ហើយពួកគេនៅពីក្រោយការជំរុញ ដើម្បីធ្វើឲ្យច្បាប់នេះក្លាយជាអចិន្ត្រៃយ៍៕