លោក Yahya Sarea គឺជាអ្នកនាំពាក្យរបស់ក្រុមឧទ្ទាមហ៊ូទីយេម៉ែនគាំទ្រដោយអ៊ីរ៉ង់និយាយកាលពីថ្ងៃចន្ទថា ពួកគេបានវាយប្រហារទីតាំងយោធានៅទីក្រុងកំពង់ផែ Eilat របស់អ៊ីស្រាអែល ដោយប្រើប្រាស់មីស៊ីលបាលីស្ទិកប្រភេទថ្មី ។

ការប្រកាសបែបនេះ វាគឺជាលើកដំបូងហើយដែលក្រុមឧទ្ទាមហ៊ូទី មានគោលដៅលើទីតាំងយោធាដោយប្រើប្រាស់មីស៊ីលបាលីស្ទិក Palestine ។

ក្រុមឧទ្ទាមហ៊ូទី ដែលគ្រប់គ្រងតំបន់មានពលរដ្ឋរស់នៅច្រើនបំផុតរបស់យេម៉ែន និងសម្របខ្លួនតាមអ៊ីរ៉ង់ បានវាយប្រហារនាវានៅជិតតំបន់ឆ្នេររបស់ខ្លួនអស់រយៈពេលជាច្រើនខែមកហើយ ដោយពួកគេនិយាយថា ការវាយប្រហារបែបនេះ ដើម្បីបង្ហាញសាមគ្គីភាពជាមួយជនប៉ាឡេស្ទីនដែលកំពុងធ្វើសង្រ្គាមជាមួយអ៊ីស្រាអែលនៅតំបន់ហ្កាហ្សាស្រ្ទីប ។

កាលពីខែវិច្ឆិកាឆ្នាំមុន ក្រុមឧទ្ទាមហ៊ូទីដែលគ្រប់គ្រងទីក្រុង Sanaa បានចាប់ផ្តើមបាញ់មីស៊ីលបាលីស្ទីកប្រឆាំងនាវា និងយានដ្រូន ដែលដាក់គោលដៅលើនាវាមានទំនាក់ទំនងជាមួយអ៊ីស្រាអែល ឆ្លងកាត់សមុទ្រក្រហម ដើម្បីបង្ហាញសាមគ្គីភាពជាមួយជនប៉ាឡេស្ទីន នៅតំបន់ហ្កាហ្សាស្ទ្រីប ។ 

ជាការឆ្លើយតបនឹងទង្វើបែបនេះ កងកម្លាំងចម្រុះដឹកនាំដោយអាមេរិក និងអង់គ្លេស ដែលមានមូលដ្ឋាននៅលើដែនទឹកនោះ បានវាយឆ្មក់តាមអាកាស និងបានវាយប្រហារដោយមីស៊ីល ទៅលើគោលដៅរបស់ក្រុមហ៊ូ ចាប់តាំងពីខែកុម្ភៈរហូតមក ៕