មន្ត្រីរបស់ទីក្រុងតូក្យូ នៅថ្ងៃអង្គារ (ទី៤ ខែមិថុនា) នេះ បាននិយាយថា រដ្ឋធានីរបស់ប្រទេសជប៉ុនមួយនេះ នឹងចាប់ផ្តើមបង្កើតកម្មវិធីណាត់ជួបផ្ទាល់របស់ទីក្រុង នៅដើមរដូវក្តៅនេះ ដែលនេះជាផ្នែកនៃកិច្ចខិតខំប្រឹងប្រែងរបស់រដ្ឋាភិបាល ក្នុងការជួយជំរុញដល់អត្រាកំណើតជាតិដែលកំពុងតែធ្លាក់ចុះ។

អ្នកប្រើប្រាស់កម្មវិធី ឬអេបនេះ នឹងត្រូវតម្រូវឲ្យដាក់ឯកសារ ដែលបង្ហាញថា ពួកគេនៅលីវស្របច្បាប់ និងចុះហត្ថលេខាលើលិខិតដែលបញ្ជាក់ថា ពួកគេមានបំណងចង់រៀបអាពាហ៍ពិពាហ៍។ 

ការបញ្ជាក់ពីប្រាក់ចំណូលរបស់បុគ្គលម្នាក់ៗ គឺជារឿងធម្មតានៅលើកម្មវិធីណាត់ជួបរបស់ជប៉ុន ប៉ុន្តែទីក្រុងតូក្យូនឹងទាមទារលិខិតបញ្ជាក់ពន្ធ ដើម្បីបញ្ជាក់ពីប្រាក់ខែប្រចាំឆ្នាំ។

មន្ត្រីរដ្ឋាភិបាលក្រុងតូក្យូទទួលបន្ទុកកម្មវិធីថ្មីនេះ បានប្រាប់សារព័ត៌មាន AFP ថា៖ «យើងបានដឹងថា ៧០ភាគរយនៃអ្នកដែលចង់រៀបការ មិនចូលរួមយ៉ាងសកម្មក្នុងព្រឹត្តិការណ៍ ឬកម្មវិធីស្វែងរកគូស្រករនោះឡើយ»។ លោកបានបញ្ជាក់បន្ថែមថា៖ «យើងចង់ផ្តល់ឲ្យពួកគេនូវការលើកទឹកចិត្តដ៏ទន់ភ្លន់មួយ ក្នុងការស្វែងគូជីវិត»។

វាមិនមែនជារឿងប្លែកនោះឡើយ ដែលសាលាក្រុងរៀបចំព្រឹត្តិការណ៍ផ្គូផ្គងគូស្រករ នៅក្នុងប្រទេសជប៉ុន ជាកន្លែងដែលអត្រាកំណើតបានធ្លាក់ចុះដល់កម្រិតថ្មី ក្នុងឆ្នាំ២០២៣ ប៉ុន្តែវាកម្រមានណាស់ ដែលរដ្ឋាភិបាលក្នុងតំបន់ បង្កើតកម្មវិធីមួយ។

គួរបញ្ជាក់ថា កាលពីឆ្នាំមុន ជប៉ុនបានកត់ត្រាចំនួនទារកស្លាប់ច្រើនជាងទារកទើបកើតដល់ទៅ ២ដង។ ទិន្នន័យបឋមរបស់រដ្ឋាភិបាល បានបង្ហាញថា អត្រាកំណើតបានធ្លាក់ចុះក្នុងរយៈពេល ៨ឆ្នាំជាប់ៗគ្នា ដល់ចំនួន ៧៥៨.៦៣១នាក់ ដោយធ្លាក់ចុះ ៥,១ភាគរយ។ ចំណែកអត្រាមរណភាព មានចំនួន ១.៥៩០.៥០៣នាក់៕