​បាល់ទាត់៖ ​ទីបំផុត​ខ្សែ​ជីវិត​របស់​ខ្សែប្រយុទ្ធ​អា​ហ្ស​ង់​ទីន Lionel Messi ពិតជា​មិន​រួមរស់​ជា​មួយ Barcelona រហូត​បញ្ចប់​អាជីព​របស់ខ្លួន​ឡើយ បន្ទាប់ពី​កីឡាករ​វ័យ ៣៤ឆ្នាំ​រូបនេះ​ចុះហត្ថលេខា​ផ្លូវ​ការលេង​ឱ្យ​ក្លិប​បារាំង Paris Saint Germain​។

​​មានរឿង​ជាច្រើន​កើតឡើង​ប៉ុន្មាន​សប្តាហ៍​ចុងក្រោយ រួមទាំង​ការសរសេរ​ព័ត៌មាន​ច​ចាម​អារ៉ាម ការមិន​បញ្ចេញ​ព័ត៌មាន​ពិតជុំវិញ​អនាគត​របស់ Lionel Messi ថា​នៅ​ជាមួយ Barcelona រឺ​ចាកចេញ​។ ​អ្វីៗ​ត្រូវ​លាតត្រដាង​ក្នុង​សន្និសីទ​សារព័ត៌មាន​ពី​ការចាកចេញ​របស់ Lionel Messi ពី Barcelona ដោយ​មិន​អស់ចិត្ត​ទាំងសងខាង ទាំង​ភាគី​កីឡាករ និង​ក្លិបបន្ទាប់ពី​ការបន្ត​កិច្ចសន្យា​ថ្មី​បរាជ័យ​ ដោយហេតុ​ផល​ហិរញ្ញវត្ថុ​តឹង​រ៉ឺង​ដែល​កំណត់ដោយ La Liga​។ ​​អ្វី​ក៏ត្រូវ​លាតត្រដាង​ម្តងទៀត​នៅ​យប់​ថ្ងៃ​អង្គារ​ម្សិលមិញ គឺ​ការ​មកកាន់​ទ្រនំ​ថ្មី​ជា​ផ្លូវការ​ជាមួយ Paris Saint Germain ក្នុង​កិច្ចសន្យា ២​ឆ្នាំបូក​បន្ថែម​លក្ខខណ្ឌ​បន្ត​បន្ថែម ១ឆ្នាំ​ទៀត ខណៈ Messi នឹង​ទទួលបាន​ប្រាក់ចំនូល​ពី PSG ប្រមាណ ៣៥លាន​អឺរ៉ូ​ក្នុង​មួយឆ្នាំ​។ ​​ការមកដល់​ទីក្រុង​ប៉ារីស​នេះ Messi ដែល​នឹង​ពាក់អាវ​លេខ ៣០ នោះបាន​និយាយថា គេ​មាន​អារម្មណ៍​អន្ទះសារក្នុងការ​ចាប់ផ្តើម​ទំព័រ​ថ្មី​នៃ​អាជីព​នៅ​ប៉ារីស​នេះ ជា​ក្លិប​ដែលមាន​សក្តានុពល និង​ចក្ខុវិស័យ​វែងឆ្ងាយ​។

បន្ទាប់ពី​សម្រក់​ទឹកភ្នែក​ក្នុង​សន្និសីទ​ចុងក្រោយ​ជាមួយ Barcelona, Messi សង្ឃឹមថា​ ទាញ​យក​ស្នាមញញឹម​មកវិញ​នៅ​កីឡដ្ឋាន Parc de Prince ជាពិសេស​សហការ​ឱ្យបាន​ល្អ​ជាមួយ​មិត្ត​រួម​ក្រុម​ថ្មី​។ ​​ចំណែក​ប្រធាន​ក្លិប PSG លោក Nasser al-Khelaifi បាន​និយាយ​ដែរ​ថា លោក​ពិត​មាន​ក្តីរំភើប​ដែល Messi សំរេចចិត្ត​ជ្រើសរើស PSG ហើយ​ពួកយើង​ពិត​ជាមាន​មោទក​ភាព​ចំពោះ​វត្តមាន Messi នៅពេលនេះ​។​ ​Lionel Messi គឺជា​អ្នក​ស៊ុត​បញ្ចូល​ទី​ច្រើន​បំផុត​ក្នុង​ប្រវត្តិសាស្ត្រ Barcelona ដោយ​រកបាន​សរុប ៦៧២គ្រាប់ ឈ្នះ​ពាន La Liga ១០លើក, UEFA Champions League ៤លើក, Copa del Rey ៧លើក ក៏ដូចជា​ឈ្នះ​ពាន​ឯកត្តជន Ballon d’Or ៦លើក​ច្រើនជាងគេ​។​ Messi បាន​ក្លាយជា​កីឡា​ករទី៤ ដែល​មកកាន់ Paris Saint Germain ដោយ​គ្មាន​តម្លៃ​ផ្ទេរបន្ទាប់ពី​ខ្សែបំរើ​ហូ​ឡង់ Georginio Wijnaldum ពី Liverpool, ខ្សែការពារ​អេ​ស្ប៉ា​ញ Sergio Ramos ពី Real Madrid និង​អ្នកចាំទី​ឆ្នើម​អ៊ីតាលី Gianluigi Donnarumma ពី AC Milan​។​ ​Messi នឹង​អាច​បង្ហាញខ្លួន​ដំបូង​ឱ្យ Paris Saint Germain ចុង​សប្តាហ៍​នេះ​តែម្តង​ក្នុង​សប្តាហ៍​ទី២ នៃ​ក្របខណ្ឌបារាំង Ligue 1 ទទួលភ្ញៀវ Strasbourg៕

​អត្ថបទ​៖​នាង សុភា​វុ​ធ