រលកកម្ដៅដ៏យូរ និងសីតុណ្ហភាពក្ដៅហក់ឡើងខ្លាំង ដែលបានចាប់តាំងពីថ្ងៃអង្គារមក នៅភាគខាងលិចរបស់សហរដ្ឋអាមេរិក បានបង្កការប៉ះពាល់ប្រជាជនអាមេរិកជាង ៣៤ លាននាក់ ។

ក្រុមអ្នកព្យាករណ៍កំពុងព្រមានប្រជាពលរដ្ឋនៅក្នុងរដ្ឋកាលីហ្វ័រនីញ៉ា ណេវ៉ាដា យូថា និងអារីហ្សូណា ឱ្យត្រៀមខ្លួនទប់ទល់សីតុណ្ហភាពឡើងដល់កម្រិតខ្ពស់បំផុត។

ក្រោយមកក្នុងសប្តាហ៍នេះ សីតុណ្ហភាពក្ដៅខ្លាំង ត្រូវគេរំពឹងថានឹងគ្របដណ្ដប់ទៅដល់តំបន់ប៉ាស៊ីហ្វិកភាគពាយ័ព្យ។

សីតុណ្ហភាពស្រដៀងគ្នាកាលពីឆ្នាំមុន បានសម្លាប់មនុស្សយ៉ាងហោចណាស់រាប់សិបនាក់នៅភាគនិរតីរបស់សហរដ្ឋអាមេរិក។

ការព្យាករណ៍បង្ហាញថាសីតុណ្ហភាពអាចឡើងដល់១០៨ហា្វរិនហៃ ឬស្មើ ៤២,២អង្សាសេ នៅទូទាំងតំបន់ដ៏ធំ នៃរដ្ឋកាលីហ្វ័រនីញ៉ា ចាប់ពីទីក្រុងសាក្រាមិនតូ(Sacramento)ដល់ទីក្រុង បេកឃើស្វៀល (Bakersfield) ។

សេវាអាកាសធាតុជាតិ (NWS) បានចេញការព្រមានពីកម្ដៅខ្លាំង សម្រាប់តំបន់ សែនត្រលវ៉ាឡេ(Central Valley) របស់រដ្ឋនេះ កាលពីថ្ងៃអង្គារសប្ដាហ៍នេះ។

សាក្រាមិនតូ ត្រូវគេរំពឹងថានឹងមើលឃើញសីតុណ្ហភាពខ្ពស់បីខ្ទង់ គិតជាហ្វារិនហៃ ដំបូងនៅឆ្នាំនេះ ក្នុងសប្ដាហ៍នេះ។ កាលពីឆ្នាំមុន រដ្ឋធានីរបស់រដ្ឋកាលីហ្វ័រនីញ៉ា មួយនេះ ពុំបានទទួលរងរលកកម្ដៅខ្លាំងទេ រហូតដល់ចុងខែមិថុនា។

នៅថ្ងៃពុធសប្ដាហ៍នេះ មានការព្រមានថា សីតុណ្ហភាពក្ដៅខ្លាំង នឹងហក់ឡើងខ្ពស់បន្ថែមទៀតពីភាគខាងកើតទីក្រុង Las Vegas ទៅដល់តំបន់ ហាវ៉ាស៊ូស៊ីរី (Havasu City) នៃរដ្ឋ Arizona ។

គេរំពឹងថា ថ្ងៃព្រហស្បតិ៍សប្ដាហ៍នេះ គឺជាថ្ងៃដ៏អាក្រក់បំផុតក្នុងសប្តាហ៍នេះ ដោយសារកម្ដៅក្ដៅខ្លាំងពេក៕