យុទ្ធនាការនិមិត្តសញ្ញាសារព័ត៌មាន (PEC) បាននិយាយកាលពីថ្ងៃអង្គារសប្ដាហ៍នេះថា ក្នុងរយៈពេល ២០ ឆ្នាំ មកនេះ អ្នកសារព័ត៌មានជាង ២.០០០នាក់ បានស្លាប់នៅជុំវិញពិភពលោក ជាមធ្យម ១០០នាក់ក្នុងមួយឆ្នាំ។

លោក ប្លេស ឡេមភែន (Blaise Lempen)ប្រធានយុទ្ធនាការ PEC បាននិយាយនៅថ្ងៃខួបលើកទី២០ ឆ្នាំ នៃការបង្កើតក្រុមតាមដានការបាត់បង់អាយុជីវិតអ្នកសារព័ត៌មាន ដែលមានមូលដ្ឋាននៅទីក្រុងហ្សឺណែវថា ការស្លាប់នេះ គឺជាចំនួនដ៏ច្រើនបំផុត ។

កង្វល់ចម្បងរបស់យើងនៅតែជានិទណ្ឌភាពដែលបង្ហាញពីឧក្រិដ្ឋកម្មភាគច្រើនដែលបានប្រព្រឹត្តលើអ្នកសារព័ត៌មាន។

PEC បាននិយាយថា ការកើនឡើងប្រចាំឆ្នាំនៃចំនួនជនរងគ្រោះក្នុងរយៈពេល ២០ ឆ្នាំកន្លងមកនេះ គឺដោយសារតែជម្លោះប្រដាប់អាវុធជាបន្តបន្ទាប់នៅលើពិភពលោក។

PEC បាននិយាយថា ជម្លោះទាំងនោះរួមមានសង្រ្គាមនៅអ៊ីរ៉ាក់ពីឆ្នាំ ២០០៣ សង្រ្គាមនៅក្នុងប្រទេសស៊ីរីពីឆ្នាំ ២០១១ សង្រ្គាមនៅអ៊ុយក្រែនក្នុងឆ្នាំ ២០២២និងជម្លោះនៅហ្កាហ្សាចាប់ពីខែតុលាឆ្នាំ ២០២៣។

PEC បាននិយាយថា ជម្លោះអ៊ីស្រាអែល និងប៉ាឡេស្ទីន ចាប់តាំងពីថ្ងៃទី ៧ ខែតុលា ឆ្នាំ ២០២៣មក គឺជាជម្លោះដ៏សាហាវបំផុតសម្រាប់ប្រព័ន្ធផ្សព្វផ្សាយក្នុងរយៈពេលដ៏ខ្លី ប្រហែល៨ខែ ដែលមានជនអ្នកសារព័ត៌មានជិត១៣០នាក់ បានស្លាប់ ដែលចំនួននេះស្មើអ្នកសារព័ត៌មាន ដែលបានស្លាប់ក្នុងសង្គ្រាមស៊ីវិលនៅស៊ីរីចន្លោះឆ្នាំ ២០១១ និង២០២០ ។

សរុបមកម៉ិកស៊ិកគឺជាប្រទេសដែលមានចំនួនអ្នកសារព័ត៌មានស្លាប់ច្រើនជាងគេបំផុតនៅចន្លោះឆ្នាំ ២០០៤ និង ២០២៣ ដោយមានអ្នកសារព័ត៌មានជាង២០០ នាក់បានស្លាប់ក្នុងរយៈពេល ២០ ឆ្នាំ។

ក្រុមនេះបានឲ្យដឹងថា បណ្ដាប្រទេសឬដែនដី ដែលជួបគ្រោះថ្នាក់បំផុតបន្ទាប់ចាប់តាំងពីឆ្នាំ ២០០៤ គឺតំបន់ហ្កាហ្សា និង និង West Bank ក្នុងដែនដី ប៉ាឡេស្ទីន ស៊ីរី អ៊ីរ៉ាក់ ប៉ាគីស្ថាន អាហ្វហ្គានីស្ថាន ហ្វីលីពីន ឥណ្ឌា ហុងឌូរ៉ាស និងសូម៉ាលី ៕