យោងតាមតួលេខផ្លូវការត្រូវបានចេញផ្សាយដោយអ៊ីស្រាអែល ចំណាប់ខ្មាំងជនជាតិអ៊ីស្រាអែលប្រហែល៨០ នាក់ត្រូវបានគេគិតថានៅតែជាប់ឃុំក្នុងដៃក្រុមហាម៉ាស នៅក្នុងដែនដីហ្កាហ្សា បន្ទាប់ពី៤៣នាក់ ត្រូវបានប្រកាសថាបានស្លាប់ដោយកំបាំងមុខកាលពីថ្ងៃអង្គារទី៤ឧសភា សប្ដាហ៍នេះ ។

ចំណាប់ខ្មាំង៤នាក់ទៀតត្រូវបានបញ្ចូលទៅក្នុងបញ្ជីអ្នកស្លាប់កាលពីមួយថ្ងៃមុន មានដូចជា លោក ខេម ផេរី (Chaim Peri) លោក យ័រម៉ា មេតហ្គើ (Yoram Metzger) លោក អាមីរាំ យូនីស ខូបភ័រ (Amiram Cooper) និង លោក ណាដាវ ផប់ផ្លេវ៉េល (Nadav Popplewell) ត្រូវបានគេជឿថា បានស្លាប់នៅក្នុងទីក្រុង ខាន់យូនីស (Khan Younis)ភាគខាងត្បូងដែនដីហ្កាហ្សា កាលពីប៉ុន្មានខែមុន នេះបើយោងតាមរបាយការណ៍របស់កងកម្លាំងការពារអ៊ីស្រាអែល (IDF)។

អ្នកនាំពាក្យកងកម្លាំង IDF លោក Daniel Hagari បានលើកឡើងថា ចំណាប់ខ្មាំងទាំងបួននាក់បានបាត់បង់ជីវិត ខណៈយោធារបស់ប្រទេសនេះ កំពុងប្រតិបត្តិការនៅទីក្រុងនេះ។

យើងកំពុងពិនិត្យយ៉ាងហ្មត់ចត់នូវកាលៈទេសៈនៃការស្លាប់របស់ពួកគេ និងពិនិត្យមើលគ្រប់លទ្ធភាពទាំងអស់។ យើងនឹងបង្ហាញការរកឃើញឆាប់ៗនេះ ជាដំបូងដល់ក្រុមគ្រួសាររបស់ពួកគេ ហើយបន្ទាប់មកដល់សាធារណជន។ យើងនឹងបង្ហាញពួកគេដោយតម្លាភាព ដូចដែលយើងបានធ្វើរហូតមកដល់ពេលនេះ៕