រដ្ឋមន្ត្រីដឹកជញ្ជូនក្រិក លោក Christos Stylianides បានប្រាប់សារព័ត៌មានរ៉យទ័រ ក្នុងបទសម្ភាសន៍មួយកាលពីថ្ងៃអង្គារថា កិច្ចសហប្រតិបត្តិការអន្តរជាតិកាន់តែជិតស្និទ្ធរវាងបេសកកម្មកងទ័ពជើងទឹក នៅ សមុទ្រក្រហម បានកាត់បន្ថយចំនួនការវាយប្រហារដោយក្រុមហ៊ួទីនៅប្រទេសយេម៉ែន ក្នុងរយៈពេលមួយសប្តាហ៍កន្លងមកនេះ។

ប្រទេសក្រិក គឺជាទីតាំងនៃទីស្នាក់ការកណ្តាលនៃប្រតិបត្តិការកងទ័ពជើងទឹករបស់សហភាពអឺរ៉ុប នៅ សមុទ្រក្រហម ដែលត្រូវបានគេដាក់ឈ្មោះថា «Aspides» ហើយជាភាសាក្រិចមានន័យថា «ខែល»។

លោក Stylianides បាននិយាយនៅក្រៅសប្តាហ៍ដឹកជញ្ជូនរបស់ក្រុមហ៊ុន Posidonia នៅទីក្រុងអាថែនថា ថា៖«សម្រាប់ពួកយើង វាជាការពេញចិត្តដែលក្នុងអំឡុងពេលសប្តាហ៍មុននេះ យើងឃើញការថយចុះគួរឲ្យកត់សម្គាល់នៃចំនួន និងកម្លាំងនៃការវាយប្រហារ។ នេះ គឺជាការពិត»។

«វាជាភ័ស្តុតាងមួយទៀតដែលសហគមន៍អន្តរជាតិមានការជឿជាក់យ៉ាងមុតមាំ អាចបញ្ឈប់បញ្ហានេះ»។

កិច្ចប្រតិបត្តិការ Aspides ត្រូវបានបង្កើតឡើង នៅឆ្នាំនេះ ដើម្បីការពារនាវាប្រឆាំងនឹងការវាយប្រហារដោយក្រុមសកម្មប្រយុទ្ធហ៊ួទីដែលមានសម្ព័ន្ធមិត្តជាមួយអ៊ីរ៉ង់ បានបើកការវាយប្រហារដោយដ្រូន និងមី ស៊ីលម្តងហើយម្តងទៀត នៅក្នុងតំបន់សមុទ្រក្រហម ចាប់តាំងពីខែវិច្ឆិកា ហើយបានពង្រីកការវាយប្រហារទៅកាន់ផ្លូវទឹកដ៏មមាញឹកផ្សេងទៀត។

ក្រុមហ៊ួទី ពិពណ៌នាការវាយប្រហាររបស់ពួកគេថា ជាសកម្មភាពនៃសាមគ្គីភាពជាមួយប៉ាឡេស្ទីន ក្នុង សង្គ្រាមរបស់អ៊ីស្រាអែល នៅតំបន់ហ្កាហ្សា។