ស្ថាប័នឃ្លាំមើលតាមប្រព័ន្ធអ៊ីនធឺណិត (eSafety) របស់ប្រទេសអូស្ត្រាលី នៅថ្ងៃពុធ (ទី៥ ខែមិថុនា) នេះ បានទម្លាក់កិច្ចខិតខំប្រឹងប្រែងផ្នែកច្បាប់ ដើម្បីបង្ខំឲ្យបណ្ដាញសង្គម X របស់លោក Elon Musk លុបចោលនូវការបង្ហោះដែលពិពណ៌នាអំពីការចាក់សម្លាប់សង្ឃកាតូលិកជាន់ខ្ពស់ នៅទីក្រុងស៊ីដនី។

ស្នងការរបស់ eSafety លោកស្រី Julie Inman Grant បានឲ្យដឹងនៅក្នុងសេចក្តីថ្លែងការណ៍ថា៖ «ខ្ញុំបានសម្រេចមិនបន្តដំណើរការនៅក្នុងតុលាការសហព័ន្ធប្រឆាំងនឹងក្រុមហ៊ុន X Corp ទៀតទេ»។

គួរបញ្ជាក់ថា ស្ថាប័នឃ្លាំមើលនេះ បានបញ្ជាឲ្យក្រុមហ៊ុនរបស់លោក Musk លុបចោលជាសកលនូវវីដេអូ និងខ្សែអាត់សំឡេងចំនួន ៦៥ឃ្លីប ពាក់ព័ន្ធនឹងការវាយប្រហារមិនបណ្ដាលឲ្យបាត់បង់ជីវិត កាលពីថ្ងៃទី១៥ ខែមេសា លើសង្ឃកាតូលិកជាន់ខ្ពស់របស់វិហារ Assyrian។ ប៉ុន្តែបណ្ដាញសង្គម X បានជំទាស់នឹងសិទ្ធិរបស់គណៈកម្មាការ ដែលចេញបញ្ជាឲ្យលុបចោលជាសកលនេះ ដោយលើកហេតុផលថា ការទប់ស្កាត់អ្នកប្រើប្រាស់តាមភូមិសាស្ត្រ ក្នុងប្រទេសអូស្ត្រាលី គឺគ្រប់គ្រាន់ហើយ។

សូមបញ្ជាក់បន្ថែមថា ការបង្ហោះដែលនាំឲ្យមានបញ្ហាចម្រូងចម្រាស បានបង្ហាញឲ្យឃើញពីសង្ឃជាន់ខ្ពស់របស់សាសនាគ្រិស្តអូស្សូដក់ ព្រះនាម Mar Mari Emmanuel ត្រូវបានគេចាក់ប្រមាណជា ៦ដង អំឡុងពេលផ្ដល់ឱវាទដោយផ្សាយផ្ទាល់។

ក្មេងប្រុសអាយុ ១៦ឆ្នាំម្នាក់ ត្រូវបានចាប់ខ្លួន និងចោទប្រកាន់ពីបទ «ប្រព្រឹត្តអំពើភេរវកម្ម» ពាក់ព័ន្ធនឹងការវាយប្រហារនេះ ដែលត្រូវបានគេនិយាយថា មានហេតុផលខាងសាសនា៕