គណបក្សប្រឆាំងដ៏សំខាន់របស់ប្រទេសឥណ្ឌា គឺគណបក្ស Congress ក្នុងការបោះឆ្នោតសកល ដណ្តើមបានអាសនៈសភាទាំង២ នៅរដ្ឋ Manipur ដែលត្រូវបានបែងចែកដោយជម្លោះហិង្សា ខណៈដែលរដ្ឋនៅភាគឦសានមួយនេះ បានប្រើសំឡេងឆ្នោតបដិសេធមិនទទួលយកគណបក្សកាន់អំណាចរបស់នាយករដ្ឋមន្ត្រី លោក Narendra Modi និងសម្ព័ន្ធមិត្ត បន្ទាប់ពីមានការប៉ះទង្គិចគ្នា រវាងជនជាតិភាគតិចរយៈពេល ១ឆ្នាំ។

ចាប់តាំងពីខែឧសភាឆ្នាំមុន រដ្ឋដាច់ស្រយាលដែលនៅជាប់ព្រំដែនសហភាពមីយ៉ាន់ម៉ា បានរង្គោះរង្គើដោយការប្រយុទ្ធគ្នា រវាងប្រជាជនភាគច្រើន Meitei និងកុលសម្ព័ន្ធ Kuki-Zo ដែលការប៉ះទង្គិចដោយហិង្សានោះ បានបណ្ដាលឲ្យមនុស្សយ៉ាងហោចណាស់ ២២០នាក់ ស្លាប់ និង ៦០.០០០នាក់ ផ្លាស់ទីលំនៅទៅកាន់ជំរុំសង្គ្រោះ។

រដ្ឋដែលមានប្រជាជន ៣,២លាននាក់ បន្តបែងចែកជាពីរតំបន់ ដោយតំបន់ជ្រលងភ្នំគ្រប់គ្រងដោយក្រុមជនជាតិ Meitei ហើយក្រុម Kuki ត្រួតត្រាតំបន់ភ្នំ ពោលគឺត្រូវបានបែងចែកដោយតំបន់លាតសន្ធឹងនៃ «ផ្ទៃដីគ្មានមនុស្សរស់នៅ» ដែលត្រូវបានត្រួតពិនិត្យដោយកងកម្លាំងប្រដាប់អាវុធសហព័ន្ធ។ ក្នុងរយៈពេលឆ្ពោះទៅការបោះឆ្នោត ជនរងគ្រោះនៃភាគីទាំងសងខាងពីការបែងចែកបក្សពួកនេះ បានសម្តែងការមិនពេញចិត្ត ចំពោះលោក Modi និងគណបក្ស Bharatiya Janata (BJP) របស់លោក ដែលមិនអាចនាំឲ្យមានសន្តិភាពដល់រដ្ឋនេះ។

ក្រោយផ្តួលគូប្រជែងរបស់ខ្លួន គឺគណបក្ស BJP ជាមួយសំឡេងឆ្នោតជិត ១១០.០០០សំឡេង នៅក្នុងដែនដីត្រួតត្រាដោយជនជាតិភាគតិច Meitei របស់រដ្ឋ Manipur នេះ លោក A Bimol Akoijam របស់គណបក្ស Congress បាននិយាយថា៖ «នេះគឺជាសំឡេងរបស់មនុស្សដែលស្រឡាញ់មាតុភូមិរបស់ពួកគេ និងអ្នកដែលមិនពេញចិត្ត ចំពោះរឿងដែលយើងបានឆ្លងកាត់ ក្នុងរយៈពេល ១ឆ្នាំចុងក្រោយនេះ នោះគឺទុក្ខវេទនា និងសោកនាដកម្ម»។

លោក Modi ស្ថិតនៅផ្លូវឆ្ពោះទៅកាន់ការរក្សាអំណាចរបស់ខ្លួន នៅក្នុងមុខតំណែងប្រមុខរបស់ក្រុមចម្រុះដែលកំពុងកាន់អំណាច ប៉ុន្តែគណបក្សជាតិនិយមហិណ្ឌូរបស់លោក បានបាត់បង់សំឡេងភាគច្រើនដាច់ខាតជាលើកដំបូង ក្នុងរយៈពេល ១ទសវត្សរ៍៕