​កូរ៉េខាងជើង​៖ កូរ៉េខាងត្បូង​បាន​និយាយ​ថា​ កូរ៉េខាងជើង​មិនបាន​ឆ្លើយតប​ទូរស័ព្ទ​តាម​ធម្មតា ​តាម​រយៈ​ខ្សែ​ទូរស័ព្ទ​ទាន់​ហេតុការណ៍​អន្តរ​កូរ៉េ​កាលពី​ថ្ងៃ​អង្គារ ទី​១០ ខែ​សីហា​ទេ ប៉ុន្មាន​ម៉ោង​បន្ទាប់ពី​មន្ត្រី​ជាន់ខ្ពស់​ម្នាក់​នៅ​ទីក្រុង​ព្យុងយ៉ាង​បាន​ព្រមាន​កូរ៉េខាងត្បូង ​និង​សហរដ្ឋអាមេរិក​អំពី​ស​ម​យុទ្ធ​យោធា​រួមគ្នា​ប្រចាំ​ឆ្នាំ​ដែល​នឹង​ចាប់ផ្ដើម​នៅ​សប្ដាហ៍​នេះ​។​

​លោកស្រី Kim Yo Jong ជា​ប្អូនស្រី​ដ៏​មានអំណាច​របស់​មេដឹកនាំ​កូរ៉េខាងជើង លោក Kim Jong Un ​បាន​ចោទ​កូរ៉េខាងត្បូង​ថា​ មាន​អាកប្បកិរិយា​មិន​សម​ហេតុផល​ចំពោះ​ការ​បន្ត​ធ្វើ​សម​យុទ្ធ ​បន្ទាប់ពី​កូរ៉េខាងជើង​បាន​យល់ព្រម​ត​ភ្ជាប់​ ខ្សែ​ទូរស័ព្ទ​ទាន់​ហេតុការណ៍​ឡើងវិញ​កាលពី​ចុងខែ​កក្កដា​ដែល​បាន​កាត់ផ្ដាច់​កាលពី​ឆ្នាំមុន ​ស្រប​ពេល​មាន​ភាព​តានតឹង​កើន​ឡើង​។​ ​ប្រភព​យោធា​បាន​ប្រាប់​សារព័ត៌មាន ​Reuters ថា​ ប្រទេស​កូរ៉េខាងត្បូង ​និង​សហរដ្ឋអាមេរិក​គ្រោង​នឹង​ធ្វើ​សម​យុទ្ធ​ដូច​ទៅ​នឹង​កុំព្យូទ័រ​នៅ​សប្ដាហ៍​ក្រោយ ​ប៉ុន្តែ​សម​យុទ្ធ​ដំណាក់កាល​ដំបូង​បាន​ចាប់ផ្តើម​កាលពី​ថ្ងៃ​អង្គារ​ម្សិលមិញ​។​

​នៅ​ក្នុង​សេចក្ដីថ្លែងការណ៍​មួយ​ដែល​ធ្វើឡើង​ ដោយ​ទីភ្នាក់ងារសារព័ត៌មាន​រដ្ឋ​កូរ៉េខាងជើង KCNA លោកស្រី Kim Yo Jong បាន​និយាយ​ថា​ សម​យុទ្ធ​នេះ​គឺជា​សកម្មភាព​បំផ្លាញ​ខ្លួនឯង ចំពោះ​ការដែល​មិន​ស្ដាប់​គ្នាថា ​កុំ​ឲ្យ​ធ្វើ​សម​យុទ្ធ ព្រោះ​វា​គំរាមកំហែង​ដល់​សន្តិសុខ​សុវត្ថិភាព​របស់​ប្រជាជន​យើង និង​ធ្វើឱ្យ​ស្ថានការណ៍កាន់តែ​យ៉ាប់យ៉ឺន​នៅ​ឧបទ្វីប​កូរ៉េ។​ ​លោកស្រី​បាន​និយាយ​ថា ​ទាំងនោះ​គឺជា​ការ​បង្ហាញ​យ៉ាង​ច្បាស់​បំផុត ​នៃ​គោលនយោបាយ​អរិភាព​របស់​អាមេរិក​ចំពោះ​កូរ៉េខាងជើង ដែល​ត្រូវ​បាន​បង្កើត​ឡើង​ដើម្បី​រារាំង​រដ្ឋ​របស់​យើង​ដោយ​កម្លាំង​៕

អត្ថបទ៖ សុខមាន