ភ្នំពេញ ៖ ប្រធានសមាគមសហព័ន្ធអ្នកវិនិយោគកម្ពុជា លើកឡើងថា បើទោះជាពិភពលោកកំពុងជួបនូវវិបត្តិសេដ្ឋកិច្ចយ៉ាងធ្ងន់ធ្ងរក៏ដោយ តែវិស័យកាត់ដេរ វាយនភ័ណ្ឌ និងស្បែកជើងនៅក្នុងប្រទេសកម្ពុជា អាចរក្សាបានកំណើនក្នុងទីផ្សារនៃបណ្តាប្រទេសអឺរ៉ុបនិ ងតំបន់មួយចំនួនគួរឲ្យកត់សំគាល់។

​នៅក្នុងពិធីបើកមហាសន្និបាតភាគហ៊ុនិក លើកទី១០ ប្រចាំឆ្នាំ នៅថ្ងៃទី៥ ខែមិថុនានេះ អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា បានមានប្រសាសន៍ឱ្យដឹងថា វិស័យកាត់ដេរ និងផលិតផលស្បែកជើង នៅក្នុងរយៈពេល ៥ខែ ឆ្នាំ២០២៤នេះ ការបញ្ជាទិញ ការនាំចេញ និងកានាំចូលរបស់រោងចក្រនីមួយៗឃើញថា មានភាពល្អប្រសើរ បន្តរក្សាបាននូវកំណើនគួរឱ្យកត់សំគាល់ បើប្រៀបធៀបនឹងរយៈពេលដូចគ្នាឆ្នាំ២០២៣កន្លងទៅ។

អ្នកឧកញ៉ា បានបន្តថា ការរក្សានូវកំណើនទីផ្សារនេះ បានក៏អាស្រ័យដោយមានការយកចិត្តទុកដាក់ដ៏ឈ្លាសវៃ មានចក្ខុវិស័យច្បាស់លាស់ ពីសំណាក់ប្រមុខរាជរដ្ឋាភិបាលកម្ពុជា ជាពិសេសការខិតខំស្វះស្វែងរកទីផ្សារនាំចេញ នាំចូល និងគៀងគរអ្នកវិនិយោគ ឱ្យមកបណ្តាក់ទុននៅកម្ពុជាជាបន្តបន្ទាប់។ ជាមួយនេះ អ្នកឧកញ៉ាបានអំពាវនាវដល់វិនិយោគគិនក្នុងនិងក្រៅប្រទេសឱ្យមកវិនិយោគនៅកម្ពុជាឱ្យបានច្រើន ព្រោះកម្ពុជា ជាប្រទេសមានសន្តិភាព មានស្ថេរភាពនយោបាយ មានយុវជនក្រោមអាយុ២៥ឆ្នាំ រហូតដល់ទៅជាង ៦០% ដែលតម្រូវការកម្លាំងពលកម្ម ប្រជាជនចរិកស្លូតត្រង់ រួសរាលរាក់ទាក់ ជាឱកាសដ៏ល្អសម្រាប់អ្នកវិនិយោគគ្រប់រូប។

បើតាមការបញ្ជាក់របស់ លោក សេម យ៉ាង ប្រធានក្រុមប្រឹក្សាភិបាលក្រុមហ៊ុន ហ្គ្រេនធ្វីន អ៊ិនធើណេសិនណល (ខេមបូឌា) ភីអ៊ិលស៊ី ហៅកាត់ GTI ដែលបានមកវិនិយោគនៅក្នុងប្រទេសកម្ពុជាជិត៣០ឆ្នាំ បានលើកឡើងថា កម្ពុជា ជាប្រទេសដែលផ្តល់ឱកាសវិនិយោគយ៉ាងល្អសម្រាប់អ្នកមានបំណងមកបណ្តាក់ទុករកស៊ី ហើយនេះជាលើកទី១០ ដែលក្រុមហ៊ុនបានបោះឆ្នោតបែងចែកភាគលាភ ដល់ភាគហ៊ុនិករបស់ GTI ដែលជាក្រុមហ៊ុនផ្សារភាគហ៊ុននៅកម្ពុជាដំបូងគេ និងបានប្រកាសពីការចំណេញរបស់អ្នកវិនិយោគ ដែលបានទិញផ្សារភាគហ៊ុនពីក្រុមហ៊ុន GTI នាពេលកន្លងមក៕

អត្ថបទ ៖ ឈិត បូរ៉ាវី