រដ្ឋមន្ត្រីការបរទេសនូវ៉េលហ្សេឡង់ លោក Winston Peters បានជួបជាមួយនាយករដ្ឋមន្ត្រីវៀតណាម លោក Pham Minh Chinh នៅថ្ងៃពុធ (ទី៥ ខែមិថុនា) នេះ អំឡុងពេលបំពេញទស្សនកិច្ចរយៈពេល ២ថ្ងៃ នៅទីក្រុងហាណូយ។ សម្រាប់លោក Peters លោកកំពុងធ្វើដំណើរទស្សនកិច្ច នៅតំបន់អាស៊ីអាគ្នេយ៍ ពោលគឺការធ្វើដំណើរលើកដំបូងរបស់លោកមកកាន់តំបន់នេះ គិតចាប់តាំងពីចូលកាន់តំណែង ក្នុងខែវិច្ឆិកា ឆ្នាំ២០២៣។

លោកនាយករដ្ឋមន្ត្រី Chinh បានទៅបំពេញទស្សនកិច្ចនៅនូវ៉ែលហ្សេឡង់ ក្នុងខែមីនា ជាកន្លែងដែលប្រទេសទាំង២ បានព្រមព្រៀងជំរុញពាណិជ្ជកម្មទ្វេភាគីឲ្យឡើងដល់ ៣ពាន់លានដុល្លារ ក្នុងឆ្នាំ២០២៦ និងជំនួយជាង ៦លានដុល្លារនូវ៉ែលហ្សេឡង់ (ប្រមាណជា ៣,៧លានដុល្លារអាមេរិក) ដើម្បីបង្កើនសមត្ថភាពកសិកម្មរបស់វៀតណាម ជាពិសេសការនាំចេញផ្លែផាសិន និងផ្លែស្រកានាគពីវៀតណាមទៅកាន់ប្រទេសមហាសមុទ្រមួយនេះ។

គួរបញ្ជាក់ថា វៀតណាម និងនូវ៉ែលហ្សេឡង់ បានបង្កើតទំនាក់ទំនងជាមួយគ្នា ក្នុងឆ្នាំ១៩៧៥។ ហើយប្រទេសទាំង២ មានផែនការប្រារព្ធខួបលើកទី៥០ នៃទំនាក់ទំនងការទូត និងខួប ៥ឆ្នាំនៃទំនាក់ទំនងភាពជាដៃគូយុទ្ធសាស្ត្រ ក្នុងឆ្នាំ២០២៥៕