សេវាឃ្លាំមើលបម្រែបម្រួលអាកាសធាតុរបស់សហភាពអឺរ៉ុប បាននិយាយកាលពីថ្ងៃពុធ (០៥ មិថុនា) ថា រៀងរាល់ខែក្នុងពេល ១២ ខែកន្លងមកនេះជាប់ចំណាត់ថ្នាក់ថាជាខែក្តៅបំផុតក្នុងកំណត់ត្រាក្នុងការប្រៀបធៀបតាមឆ្នាំនីមួយៗ ខណៈដែលអគ្គលេខាធិការអង្គការសហប្រជាជាតិ លោក អង់តូនីញ៉ួ ហ្គុយតឺរ៉េស (Antonio Guterres) បានអំពាវនាវឱ្យមានវិធានការបន្ទាន់ដើម្បីបញ្ចៀស «ស្ថានភាពដ៏អាក្រក់បណ្ដាលមកពីអាកាសធាតុ»។

សេវាបម្រែបម្រួលអាកាសធាតុ ខនភើនីខឺស (Copernicus) បាននិយាយថា សីតុណ្ហភាពសកលជាមធ្យមសម្រាប់រយៈពេល ១២ ខែដល់ចុងខែឧសភា គឺមានកម្រិត ១,៦៣ អង្សាសេ លើសពីកម្រិតមធ្យមមុនឧស្សាហកម្ម ដែលធ្វើឱ្យវាក្លាយជារយៈពេលក្តៅបំផុតចាប់តាំងពីកំណត់ត្រាបានចាប់ផ្តើមនៅឆ្នាំ១៩៤០ មក។

ជាមធ្យម ១២ ខែនេះមិនមែនមានន័យថាពិភពលោកបានឡើងលើសកម្រិតកំណត់នៃកម្ដៅផែនដី ១,៥ អង្សាសេនោះទេ ព្រោះកម្រិតនោះពណ៌នាអំពីសីតុណ្ហភាពជាមធ្យមក្នុងរយៈពេលជាច្រើនទសវត្សរ៍ ដែលលើសពីអ្វីដែលអ្នកវិទ្យាសាស្ត្របានព្រមានពីផលប៉ះពាល់ធ្ងន់ធ្ងរ និងមិនអាចស្រោចស្រង់បាន។

នៅក្នុងរបាយការណ៍ដាច់ដោយឡែកមួយ អង្គការឧតុនិយមពិភពលោក (WMO) របស់អង្គការសហប្រជាជាតិបាននិយាយថា ឥឡូវនេះមានឱកាស ៨០ ភាគរយដែលយ៉ាងហោចណាស់ឆ្នាំមួយក្នុងចំណោម ៥ ឆ្នាំខាងមុខ នឹងមានសីតុណ្ហភាពជាមធ្យមដែលលើសពី ១,៥ អង្សាសេជាបណ្តោះអាសន្ន លើសពីកម្រិតមុនស្សាហកម្ម ដោយកើនឡើងពីឱកាស ៦៦ ភាគរយកាលពីឆ្នាំមុន។

ការបំភាយឧស្ម័នកាបូនឌីអុកស៊ីតពីការដុតឥន្ធនៈហ្វូស៊ីល ដែលជាមូលហេតុចម្បងនៃបម្រែបម្រួលអាកាសធាតុ បានឈានដល់កម្រិតខ្ពស់បំផុតកាលពីឆ្នាំមុន បើទោះបីជាមានកិច្ចព្រមព្រៀងជាសកលដែលត្រូវបានបង្កើតឡើងដើម្បីទប់ស្កាត់ការបំភាយ និងការពង្រីកយ៉ាងឆាប់រហ័សនៃថាមពលកកើតឡើងវិញក៏ដោយ៕