ភ្នំពេញ÷ កិច្ចប្រជុំ COSTI-85 បានបង្ហាញពីការប្តេជ្ញាចិត្តរបស់អាស៊ាន ក្នុងការជំរុញវិស័យវិទ្យាសាស្ត្រ បច្ចេកវិទ្យា និងនវានុវត្តន៍ តាមរយៈ កិច្ចខិតខំប្រឹងប្រែងរួម និងភាពជាដៃគូយុទ្ធសាស្ត្រជាមួយដៃគូសន្ទនា ដើម្បីដោះស្រាយបញ្ហា ជំរុញការអភិវឌ្ឍប្រកបដោយចីរភាព និងបរិយាបន្ន។

 កិច្ចប្រជុំគណៈកម្មាធិការអាស៊ាន ផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ លើកទី ៨៥ (COSTI-85) បានបិទបញ្ចប់ នៅថ្ងៃទី ៥ ខែ មិថុនា ឆ្នាំ ២០២៤ បានផ្តោតលើនវានុវត្តន៍ និងកិច្ចសហប្រតិបត្តិការក្នុងតំបន់ ដោយក្នុងនោះគណៈកម្មាធិការ នឹងបញ្ជូនលទ្ធផលនៃកិច្ចប្រជុំ និងអនុសាសន៍របស់ខ្លួន ជូនកិច្ចប្រជុំរដ្ឋមន្ត្រីអាស៊ានផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ លើកទី ២០ ដែលនឹងប្រព្រឹត្តិទៅនៅថ្ងៃទី ៧ ខែ មិថុនា ឆ្នាំ២០២៤ ដើម្បីពិនិត្យសម្រេច ។ គណៈកម្មាធិការនេះ, ដឹកនាំកិច្ចប្រជុំដោយ ឯកឧត្តម ហ៊ុល សៀងហេង អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធាន COSTI ។

 ផ្នែកសំខាន់មួយនៃកិច្ចប្រជុំ COSTI-85 នៅទីក្រុងសៀមរាបនេះ គឺការពិនិត្យសកម្មភាពដែលកំពុងបន្តចំនួន ៩៣ រួមមាន គម្រោងដែលគាំទ្រដោយមូលនិធិវិទ្យាសាស្ត្របច្ចេកវិទ្យា និងនវានុវត្តន៍អាស៊ាន (ASTIF) ។ គម្រោងសំខាន់ៗពីរ គឺគម្រោងតាមដាន ហ្សែនជំងឺរាតត្បាត សម្រាប់អាស៊ាន និងការសិក្សាតាមដានភាពស៊ាំរបស់ប្រជាជន ទៅនឹងមេរោគកូវីដ-១៩ កំពុងត្រូវបានអនុវត្ត។

កិច្ចប្រជុំគណៈកម្មាធិការអាស៊ាន ផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ បានបិទបញ្ចប់ ដោយពិនិត្យ និងព្រមព្រៀងលើ លទ្ធផលនៃការអនុវត្តអាទិភាពឆ្នាំ ២០២៣ ដែលរួមមាន៖ ការបង្កើតមជ្ឈមណ្ឌលគ្រប់គ្រងបច្ចេកវិទ្យាអាស៊ាន សិក្ខាសាលាស្តីពី បញ្ញាសិប្បនិម្មិត និងការបង្កើតយុទ្ធសាស្ត្រស្រាវជ្រាវហេដ្ឋារចនាសម្ព័ន្ធអាស៊ាន។

កិច្ចប្រជុំ COSTI-85 នេះដែរ ក៏បានបង្ហាញពីការប្តេជ្ញាចិត្តរបស់អាស៊ាន ក្នុងការជំរុញវិស័យវិទ្យាសាស្ត្រ បច្ចេកវិទ្យា និងនវានុវត្តន៍ តាមរយៈកិច្ចខិតខំប្រឹងប្រែងរួម និងភាពជាដៃគូយុទ្ធសាស្ត្រជាមួយដៃគូសន្ទនា។ កិច្ចខិតខំប្រឹងប្រែងទាំងនេះមានសារៈសំខាន់ណាស់ ក្នុងការដោះស្រាយបញ្ហាប្រឈមក្នុងតំបន់ និងសកលលោក ដើម្បីជំរុញការអភិវឌ្ឍប្រកបដោយចីរភាព និងបរិយាបន្ន ព្រមទាំងលើក កម្ពស់ ភាពប្រកួតប្រជែងរបស់អាស៊ាននៅលើឆាកពិភពលោកផងដែរ៕

អត្ថបទ៖ សុន រ៉ាឌី