ភ្នំពេញ ÷ រដ្ឋជាសមាជិកអាស៊ាន ត្រូវបានលើកទឹកចិត្តឱ្យប្រើប្រាស់មូលនិធិពីដៃគូសន្ទនារបស់អូស្ត្រាលី ចិន ជប៉ុន និងសហរដ្ឋអាមេរិក មានទំហំទឹកប្រាក់ ៣៩០ លានដុល្លារអាមេរិក ដើម្បីដោះស្រាយតម្រូវការក្នុងតំបន់ តាមរយៈដំណោះស្រាយវិទ្យាសាស្ត្រជាក់ស្តែង។

 អាស៊ានកំពុងធ្វើការជាមួយដៃគូសន្ទនាលើសកម្មភាពចំនួន ៦៩ លើផ្នែកវិទ្យាសាស្ត្របច្ចេកវិទ្យា និងនវានុវត្តន៍ ក្នុងនោះ ប្រទេសអូស្ត្រាលី កាណាដា ចិន សហភាពអឺរ៉ុប ឥណ្ឌា ជប៉ុន សាធារណរដ្ឋកូរ៉េ រុស្ស៊ី ទួរគី ចក្រភពអង់គ្លេស និងសហរដ្ឋអាមេរិក សុទ្ធតែបានចូលរួមចំណែកក្នុងគំនិតផ្តួចផ្តើមទាំងនេះ។ ជាក់ស្តែងប្រទេសអូស្ត្រាលី កំពុងគាំទ្រការបង្កើតផែនការសកម្មភាពអាស៊ាន ស្តីពីវិទ្យាសាស្ត្រ បច្ចេកវិទ្យានិងនវានុវត្តន៍ (APASTI) ឆ្នាំ២០២៦-២០៣៥ ។ ស្រដៀងគ្នានេះដែរប្រទេសចិន បានផ្តល់ថវិកាគាំទ្រគម្រោងជាច្រើន ក្រោមមូលនិធិសហប្រតិបត្តិការអាស៊ាន-ចិន (ACCF) រួមទាំងកម្មវិធីប្រកួតប្រជែងនវានុវត្តន៍ កម្មវិធីសហគ្រិនភាព ចិន-អាស៊ាន ឆ្នាំ២០២៤ និងមជ្ឈមណ្ឌលផ្ទេរបច្ចេកវិទ្យាចិន-អាស៊ានជាដើម។

ជុំវិញបញ្ហានេះ ឯកឧត្តម ហ៊ុល សៀងហេង អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានគណៈកម្មាធិការអាស៊ាន COSTI រៀបចំឡើងនៅខេត្តសៀមរាប នៅថ្ងៃទី ៥ ខែ មិថុនា ឆ្នាំ២០២៤ បានលើកឡើងថា ការប្រើប្រាស់ថវិកាដៃគូសន្ទនាមានសារៈសំខាន់ណាស់ ដើម្បីពង្រីកលទ្ធភាពក្នុងការស្រាវជ្រាវ អនុវត្តប្រកបដោយប្រសិទ្ធភាព និង ជំរុញវឌ្ឍនភាពផ្នែកវិទ្យាសាស្ត្របច្ចេកវិទ្យា និងនវានុវត្តន៍សម្រាប់អាស៊ាន។

ឯកឧត្តម បន្ថែមថា ចំណែកមូលនិធិសរុបពីដៃគូសន្ទនារួមមាន អូស្ត្រាលី ចិន ជប៉ុន និងសហរដ្ឋអាមេរិក មានចំនួនប្រមាណ ៣៩០ លានដុល្លារអាមេរិក ក្នុងនោះរដ្ឋដែលជាសមាជិកអាស៊ាន ត្រូវបានលើកទឹកចិត្តឱ្យប្រើប្រាស់មូលនិធិទាំងនេះ ប្រកបដោយ ប្រសិទ្ធភាព ដើម្បីដោះស្រាយតម្រូវការក្នុងតំបន់ តាមរយៈដំណោះស្រាយវិទ្យាសាស្ត្រជាក់ស្តែង ។ នេះគឺជាការរួមចំណែកនៃការ លើកកម្ពស់ដល់ប្រទេសអាស៊ានទាំងមូល ដើម្បីជំរុញវិស័យវិទ្យាសាស្រ្តឲ្យកាន់តែរីកចម្រើន៕

អត្ថបទ៖ សុន រ៉ាឌី