វេទិកាប្រព័ន្ធផ្សព្វផ្សាយសង្គម X និយាយថា ឥឡូវនេះខ្លួននឹងអនុញ្ញាតឱ្យមនុស្សបង្ហាញខ្លឹមសារសម្រាប់មនុស្សពេញវ័យ (មាតិកាអាសអាភាស) ដែលមានការយល់ស្រប ដរាបណាមាតិកានោះត្រូវបានដាក់ឈ្មោះបង្ហាញយ៉ាងច្បាស់លាស់។ អ្នកប្រើប្រាស់ដែលមានអាយុក្រោម ១៨ ឆ្នាំ ឬអ្នកដែលមិនបង្ហាញពីអាយុរបស់ពួកគេនៅលើគណនីបណ្ដាញសង្គមខ្លួន មិនអាចចុចដើម្បីមើលមាតិកាដែលបានសម្គាល់នោះទេ។

ជំហាននេះផ្ដល់ភាពផ្លូវការនៃគោលការណ៍ ដែលមានរួចទៅហើយនៅពេលដែលវេទិកានេះត្រូវបានគេស្គាល់ថាឈ្មោះ ធ្វីតធឺ (Twitter) មុនពេលដែលលោកមហាសេដ្ឋី អ៊ីឡុន ម៉ាស (Elon Musk) បានទិញវាកាលពីឆ្នាំ២០២២។

នៅក្នុងបច្ចុប្បន្នភាពថ្មីៗនៅលើគេហទំព័ររបស់ខ្លួន ក្រុមហ៊ុនដែលមានមូលដ្ឋាននៅទីក្រុង សាន់ហ្វ្រាន់ស៊ីស្កូ (San Francisco) សហរដ្ឋអាមេរិកនេះបាននិយាយថា អ្នកប្រើប្រាស់ «គួរតែអាចបង្កើត ចែកចាយ និងប្រើប្រាស់មាតិកាដែលទាក់ទងនឹងប្រធានបទផ្លូវភេទ ដរាបណាវាត្រូវបានផលិត និងចែកចាយដោយមានការយល់ព្រម។ ការបញ្ចេញមតិខាងផ្លូវភេទ មិនថាជាការមើលឃើញ ឬជាការសរសេរនោះទេ អាចជាទម្រង់នៃការបញ្ចេញមតិបែបសិល្បៈស្របច្បាប់»។

អេប X កំណត់ខ្លឹមសារសម្រាប់មនុស្សពេញវ័យថាជាមាតិកាដែលផលិត និងចែកចាយដោយមានការយល់ព្រម ដែលពណ៌នាអំពី «ភាពអាក្រាតកាយរបស់មនុស្សពេញវ័យ ឬអាកប្បកិរិយាផ្លូវភេទដែលមានលក្ខណៈអាសអាភាស ឬមានបំណងបង្កឱ្យមានអារម្មណ៍ផ្លូវភេទ»។

និយមន័យនេះក៏អនុវត្តចំពោះ «មាតិកាដែលបង្កើតដោយ AI រូបថត ឬគំនូរជីវចល ដូចជាភាពយន្តតុក្កតាជប៉ុន ហ៊ិនតៃ (hentai) ឬ អានីមេ (anime)»។ អ្នកប្រើដែលបង្ហោះមាតិកាពេញវ័យជាប្រចាំត្រូវបានស្នើឱ្យដាក់ប្រព័ន្ធផ្សព្វផ្សាយរបស់ពួកគេនៅពីក្រោយការព្រមានមាតិកា ហើយវានឹងចាំបាច់ត្រូវមានការទទួលស្គាល់ មុនពេលដែលមាតិកាអាចមើលបាន៕