ជាថ្មីម្តងទៀត អ្នកសារព័ត៌មានប្តេជ្ញាថា នឹងចូលរួមទប់ស្កាត់ព័ត៌មានបន្លំ និងដំណឹងក្លែងក្លាយក្នុងបរិបទបញ្ញាសិប្បនិម្មិត តាមរយៈការផ្សព្វផ្សាយព័ត៌មានពិត និងប្រភពច្បាស់លាស់។ការប្តេជ្ញានេះ ធ្វើឡើងក្នុងឱកាសអ្នកសារព័ត៌មានបានចូលរួមក្នុងសិក្ខាសាលាបណ្តុះបណ្តាលសារព័ត៌មានតំបន់មេគង្គលើកទី៣ ស្តីពី «តួនាទីប្រព័ន្ធផ្សព្វផ្សាយក្នុងការប្រយុទ្ធប្រឆាំងព័ត៌មានក្លែងបន្លំ និងដំណឹងក្លែងក្លាយក្នុងបរិបទបញ្ញាសិប្បនិម្មិត ដើម្បីសន្តិភាព ស្ថិរភាព និងវិបុលភាពតំបន់» ដែលសហការរៀបចំដោយរាជបណ្ឌិត្យសភាកម្ពុជា និងក្លិបអ្នកកាសែតកម្ពុជា ចាប់ពីថ្ងៃទី៥ដល់ថ្ងៃទី៦ ខែមិថុនានេះ ស្ថិតនៅរាជបណ្ឌិត្យសភាកម្ពុជា។

អ្នកសារព័ត៌មានបានលើកឡើកបន្តថា បន្ទាប់ពីបានចូលរួមក្នុងសិក្ខាលានេះរួចមក ទទួលបានចំណេះដឹងជាច្រើនពីវាគ្មិន និងអ្នកសារព័ត៌មានជាតិ និងអន្តរជាតិផ្សេងៗទៀត ដែលបានចែករំលែកចំណេះដឹងពាក់ព័ន្ធនឹងផលវិជ្ជាមាន និងអវិជ្ជមាននៃការផ្សព្វផ្សាយព័ត៌មាន។

ឯកឧត្តមបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា បានឱ្យដឹងដែរថា អ៊ីនធឺណិតបានក្លាយជាសមរភូមិដ៏មានឥទ្ធិពលសម្រាប់ការផ្សាយព័ត៌មានបន្លំ និងដំដំណឹងក្លែងក្លាយដែលធ្វើឱ្យខូចដល់ទំនុកចិត្តសាធារណៈចំពោះស្ថាប័នជាតិ បណ្តាលឱ្យមានការបែកបាក់គ្នាក្នុងចំណោមសហគមន៍ ការមិនទុកចិត្ត អស្ថិរភាព ការរំលោភឯកជនភាព និងការរៀបចំវេទិកាអនឡាញសម្រាប់គោលបំណងនយោបាយជាដើម។ការណ៍នេះនាំឱ្យមានភាពចលាចលសង្គម បញ្ហាប្រឈមសេដ្ឋកិច្ច និងការគំរាមកំហែងសន្តិសុខជាតិ។ ឯកឧត្តមបណ្ឌិតបន្តថា ដើម្បីលុបបំបាត់ព័ត៌មានបន្លំ និងព័ត៌មានក្លែងក្លាយ ចាំបាច់ត្រូវតែមានការចូលរួមពីគ្រប់ភាគីពាក់ព័ន្ធ និងប្រជាពលរដ្ឋផងដែរ។

កន្លងទៅ ក្រសួងព័ត៌មានបានដាក់ចេញយន្តការមួយចំនួន ដើម្បីប្រយុទ្ធប្រឆាំងព័ត៌មានក្លែងក្លាយឱ្យ មានប្រសិទ្ធិភាព ដែលក្នុងនោះរួមមាន៖ទី១.បញ្ជ្រាប និងលើកកម្ពស់ការយល់ដឹងរបស់ប្រជាពលរដ្ឋ មន្ត្រីរាជការ និងអ្នកសារព័ត៌មានអំពីអក្ខរកម្មព័ត៌មាន ប្រព័ន្ធផ្សព្វផ្សាយ និងឌីជីថល។ទី២.រៀបចំវគ្គបណ្តុះបណ្តាលសម្រាប់អ្នកសារព័ត៌មានអាជីព និងអ្នកសារព័ត៌មានពលរដ្ឋ ទី៣.ពង្រឹងប្រព័ន្ធផ្សព្វផ្សាយរដ្ឋទាំងគុណភាពនៃការផ្សាយ មាតិកានិងវិសាលភាពគ្របដណ្តប់ ទី៤.ពង្រឹងសមត្ថភាពអ្នកនាំពាក្យតាមក្រសួង-ស្ថាប័ន និងទី៥.ពង្រឹងកិច្ចសហប្រតិបត្តិការជាមួយភាគីពាក់ព័ន្ធជាពិសេសក្រុមហ៊ុនបណ្តាញសង្គម។

អត្ថបទ៖ទូច សោភ័ណ