អង្គការសុខភាពពិភពលោក (WHO) បាននិយាយកាលពីថ្ងៃពុធ (០៥ មិថុនា) ថា មនុស្សម្នាក់បានស្លាប់ដោយសារជំងឺផ្តាសាយបក្សីនៅក្នុងប្រទេសម៉ិកស៊ិក ក្នុងករណីដែលបានបញ្ជាក់ជាលើកដំបូងនៃមនុស្សឆ្លងមេរោគ H5N2 ។

WHO បាននិយាយនៅក្នុងសេចក្តីថ្លែងការណ៍មួយថា បុរសវ័យ ៥៩ ឆ្នាំនោះ បានស្លាប់នៅថ្ងៃទី២៤ ខែមេសា បន្ទាប់ពីកើតមានអាការៈគ្រុនក្តៅ ថប់ដង្ហើម រាគ និងចង្អោរ ហើយមិនមានប្រវត្តិប៉ះពាល់ជាមួយបសុបក្សី ឬសត្វផ្សេងទៀតទេ ប៉ុន្តែអ្នកស្លាប់មាន «លក្ខខណ្ឌជំងឺមូលដ្ឋានជាច្រើន»។

សេចក្តីថ្លែងការណ៍បាននិយាយថា អ្នកស្លាប់ដែលជាអ្នកស្រុកនៃរដ្ឋម៉ិកស៊ិក (the State of Mexico) រូបនេះ ត្រូវបានបញ្ជូនទៅមន្ទីរពេទ្យនៅរដ្ឋធានី ម៉ិកស៊ិកូស៊ីធី ហើយបានស្លាប់នៅថ្ងៃដដែលនោះ។ អង្គការ WHO បានបន្ថែមថា នេះគឺជា «ករណីស្លាប់ដំបូងរបស់មនុស្ស ដែលត្រូវបានបញ្ជាក់ដោយមន្ទីរពិសោធន៍ជាមួយនឹងមេរោគផ្តាសាយប្រភេទ A (H5N2) ដែលបានរាយការណ៍ទូទាំងពិភពលោក»។

លោកវេជ្ជបណ្ឌិត ចន ប្រោនស្ទេន (John Brownstein) ដែលជាអ្នកជំនាញខាងរោគរាតត្បាតនៅមន្ទីរពេទ្យកុមារបូស្តុន (Boston) សហរដ្ឋអាមេរិក បាននិយាយថា «ខណៈពេលដែលទាំងមេរោគ H5N2 និង H5N1 ស្ថិតក្នុងក្រុមនៃមេរោគគ្រុនផ្តាសាយ A ដូចគ្នានោះ មេរោគ H5N1 ត្រូវបានគេដឹងថាឆ្លងទៅមនុស្សអស់ជាច្រើនឆ្នាំមកហើយ ប៉ុន្តែនេះគឺជាករណីដំបូងគេបង្អស់ដែលមិនធ្លាប់មាននៃមេរោគ H5N2 លើមនុស្ស»៕