ព្យុះកួចបានបណ្ដាលឲ្យក្មេងប្រុសអាយុ ២ខួបម្នាក់ស្លាប់ និងម្តាយរបស់ក្មេងនោះរងរបួស កាលពីថ្ងៃពុធ (ទី៥ ខែមិថុនា) នៅពេលដែលដើមឈើមួយដើមបានរលំសង្កត់លើផ្ទះរបស់ពួកគេ នៅឯជាយក្រុង Detroit សហរដ្ឋអាមេរិក ខណៈដែលបុគ្គលិកសង្គ្រោះបន្ទាន់ ក្នុងរដ្ឋ Maryland កំពុងឆ្លើយតបទៅនឹងសេចក្តីរាយការណ៍អំពីការដួលរលំសំណង់អាគារ ដោយមនុស្សមានជាប់នៅខាងក្នុង បន្ទាប់ពីមានខ្យល់ព្យុះកួចនៅទីនោះ។

តាមរយៈការបង្ហោះនៅលើគេហទំព័ររបស់ទីក្រុង មន្ត្រីនៅក្នុងទីក្រុង Livonia រដ្ឋ Michigan បានឲ្យដឹងថា ព្យុះកួចនេះ ដែលកំពុងវិវត្តយ៉ាងឆាប់រហ័ស បានវាយប្រហារតំបន់ជាច្រើនក្នុងទីក្រុងនេះ កាលពីរសៀលថ្ងៃពុធ។ មន្ត្រីបាននិយាយថា ដើមឈើដ៏ធំមួយដើមបានសណ្ដកឫសរំលំលើផ្ទះរបស់ក្រុមគ្រួសារមួយ ហើយធ្លាក់ទៅសង្កត់លើគ្រែដែលស្ត្រីម្នាក់ និងកូនអាយុ ២ឆ្នាំរបស់ខ្លួន កំពុងដេក។ ក្រុមបុគ្គលិកបានធ្វើការជិតមួយម៉ោងសម្អាតដំបូល និងផ្នែកខ្លះរបស់ដើមឈើ ដើម្បីយកជនរងគ្រោះចេញ។ មន្ត្រីបាននិយាយថា ក្មេងដែលទើបចេះដើរតេះតះនោះ ត្រូវបានប្រកាសថា ស្លាប់នៅកន្លែងកើតហេតុ។ រីឯស្ត្រីជាម្តាយត្រូវបានបញ្ជូនទៅកាន់មន្ទីរពេទ្យមូលដ្ឋាន ក្នុងស្ថានភាពធ្ងន់ធ្ងរ។ ក្រុមមន្ត្រីបាននិយាយថា ទីក្រុង Livonia បើកស៊ីរ៉ែនប្រកាសអាសន្ន ដោយផ្អែកលើការជូនដំណឹងពីសេវាអាកាសធាតុជាតិ ឬរបាយការណ៍ព្យុះកួច។ តែទោះជាយ៉ាងណា ប្រធានផ្នែកត្រៀមសង្គ្រោះបន្ទាន់របស់ទីក្រុង Livonia លោក Brian Kahn បានឲ្យដឹងនៅក្នុងសេចក្តីថ្លែងការណ៍ថា ទីក្រុងមិនទទួលបានការព្រមានជាមុនណាមួយពីភ្នាក់ងារ ឬស្ថាប័នផ្សេងទៀតឡើយ។

ចំណែកនៅរដ្ឋ Maryland បុគ្គលិកសង្គ្រោះបន្ទាន់បានឆ្លើយតបទៅនឹងរបាយការណ៍ ដែលថា មនុស្សបានជាប់នៅខាងក្នុងសំណង់អាគារ ដែលបានដួលរលំ បន្ទាប់ពីព្យុះកួចមួយត្រូវបានប្រទះឃើញនៅក្នុងតំបន់នេះ អំឡុងពេលមានខ្យល់ព្យុះយ៉ាងខ្លាំងក្លា កាលពីយប់ថ្ងៃពុធ។ លោក Pete Piringer អ្នកនាំពាក្យសេវាកម្មពន្លត់អគ្គីភ័យ និងជំនួយសង្គ្រោះតំបន់ Montgomery បាននិយាយថា មានសេចក្តីរាយការណ៍អំពីសំណង់បាក់រលំចំនួន៣ នៅក្នុងទីក្រុង Gaithersburg ដោយមានមនុស្សជាប់នៅខាងក្នុង។ លោក Piringer បានប្រាប់ថា ការខូចខាតដ៏សំខាន់បំផុត បានកើតឡើងនៅពេលដែលដើមឈើដ៏ធំមួយបានដួលរលំលើផ្ទះរបស់គញរួសារមួយ ដោយបណ្តាលឲ្យមនុស្ស ៥នាក់រងរបួស ក្នុងនោះមានម្នាក់រងរបួសយ៉ាងធ្ងន់ធ្ងរ។ លោកបានបន្ថែមថា ពួកគេទាំងអស់ត្រូវបានបញ្ជូនទៅកាន់មន្ទីរពេទ្យ៕