វ៉ូវីណាម៖ សហព័ន្ធកីឡាវ៉ូវីណាមកម្ពុជាបានប្ដេជ្ញាសម្រួចការហ្វឹកហាត់ក្នុងស្រុក របស់ក្រុមជម្រើសជាតិឲ្យបានខ្លាំងដើម្បីពង្រឹងសមត្ថភាពត្រៀមស៊ីហ្គេម ក្រោយខកខានចេញទៅបោះជំរំហ្វឹកហាត់នៅប្រទេសវៀតណាម ដោយសារបញ្ហាកូវីដ-១៩។ នេះបើតាមការបញ្ជាក់របស់ឯកឧត្តម អ៊ូ រតនា ប្រធានសហព័ន្ធ បន្ទាប់ពីទទួលបានភ្លើងខៀវធ្វើការប្រមូលផ្ដុំហ្វឹកហាត់ នៅពហុកីឡដ្ឋានជាតិមរតកតេជោនាពេលឆាប់ៗខាងមុខ។
ឯកឧត្តម អ៊ូ រតនា បានទទួលស្គាល់ថា អំឡុងពេលខកខាកប្រមូលផ្ដុំហ្វឹកហាត់ បានធ្វើឲ្យបច្ចេកទេសរបស់កីឡាករ-កីឡាការិនីម្នាក់ៗមានការធ្លាក់ចុះ។ ដូច្នេះក្រោយមានការអនុញ្ញាតឲ្យប្រមូលផ្ដុំនៅពហុកីឡដ្ឋានជាតិមរតកតេជោ សហព័ន្ធនឹងយកឱកាសនេះដើម្បីពង្រឹងការហ្វឹកហាត់ និងស្ដារបច្ចេកទេសឡើងវិញ ដើម្បីសម្រួចសមត្ថភាពត្រៀមស៊ីហ្គេមលើកទី៣១ នៅវៀតណាមដែលពន្យារពេលពីឆ្នាំ២០២១ ទៅឆ្នាំ២០២២ ផង និងស៊ីហ្គេមឆ្នាំ២០២៣ នៅកម្ពុជាផង។
គួរដឹងថា កាលពីថ្មីៗសហព័ន្ធកីឡាវ៉ូវីណាមកម្ពុជា បានត្រួតពិនិត្យទីតាំងដើម្បីប្រមូលផ្ដុំហ្វឹកហាត់ នៅពហុកីឡដ្ឋានជាតិមរតកតេជោរួចរាល់ហើយ ខណៈក្នុងពេលឆាប់ៗខាងមុខ ក្រុមជម្រើសជាតិរបស់ខ្លួនដែលកំពុងធ្វើការហ្វឹកហាត់តាម Online តាមផ្ទះរៀងៗខ្លួន ក្នុងបរិបទកូវីដ-១៩ នោះ នឹងត្រូវផ្ទេរទៅប្រមូលផ្ដុំហ្វឹកហាត់លក្ខណៈបិទខ្ទប់នៅទីនោះ ក្រោមការសម្របសម្រួល និងរៀបចំដោយក្រសួងអប់រំ យុវជន និងកីឡា, គណៈកម្មាធិការជាតិ CAMSOC និងមជ្ឈមណ្ឌលជាតិហ្វឹកហ្វឺនកីឡា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
