រដ្ឋមន្រ្តីការបរទេសអូស្រ្តាលីលោកស្រី Penny Wong និយាយនៅថ្ងៃព្រហស្បតិ៍នេះថា ទីក្រុងកាន់បេរ៉ា ចង់ពង្រឹងទំនាក់ទំនងជាមួយប្រជុំកោះជិតខាងសូឡូម៉ុន និងក្នុងតំបន់ ជាទីដែលការសម្រេចចិត្ត ត្រូវបានបង្កើតឡើងដោយគ្មានការភ័យខ្លាច ស្របពេលដែលប្រទេសចិន បានបញ្ជូនប្រេសពិសេសរបស់ខ្លួនផងដែរទៅកាន់ទីក្រុង Honiara ដើម្បីជួបជាមួយនាយករដ្ឋមន្រ្តីថ្មីលោក Jeremiah Manele ។

លោកស្រី Wong និយាយនៅក្នុងទីក្រុង Honiara នាថ្ងៃព្រហស្បតិ៍នេះថា អូស្រ្តាលី គឺជាដៃគូអភិវឌ្ឍធំបំផុតរបស់ប្រជុំកោះសូឡូម៉ុន ហើយនិងបញ្ជូនសមាជិករដ្ឋាភិបាលជាន់ខ្ពស់បំផុតថ្នាក់ទី ២ និងថ្នាក់ទី ៣ ដើម្បីជួបលោក Manele ចាប់តាំងពីលោកជាប់ឆ្នោតកាលពីខែមុន ដោយសារពួកយើងចង់ពង្រឹងទំនាក់ទំនងរឹងមាំជាងមុន ។

អូស្រ្តាលី បានផ្តល់ការគាំទ្រផ្នែកគោលនយោបាយសម្រាប់ការបោះឆ្នោតកាលពីខែមេសា ។ ចិនបានផ្តល់ការគាំទ្រគោលនយោបាយផងដែរដល់ប្រជុំកោះមួយនេះ ដែលស្ថិតក្នុងតំបន់យុទ្ធសាស្រ្តនៅចម្ងាយ ១.៦០០គ.ម ភាគអាគ្នេយ៍ប្រទេសអូស្រ្តាលី ។

កិច្ចព្រមព្រៀងសន្តិសុខមានជាមួយចិនកាលពីឆ្នាំ ២០២២ បង្កើតឡើងដោយមេដឹកនាំមុន Manasseh Sogavare ដែលគាំទ្រទីក្រុងប៉េកាំង បានធ្វើឲ្យទីក្រុងកាន់បេរ៉ា និងទីក្រុងវ៉ាស៊ីងតោន ព្រួយបារម្ភយ៉ាងខ្លាំង ស្របពេលមានក្តីកង្វល់ចំពោះមហិច្ឆិតាកងទ័ពជើងទឹករបស់ចិននៅក្នុងតំបន់ ។

សូមបញ្ជាក់ថា ប្រជុំកោះសូឡូម៉ុន បានប្តូរទំនាក់ទំនងការទូតពីកោះតៃវ៉ាន់ មកជាមួយចិន នៅក្នុងឆ្នាំ ២០១៩ ៕