លោក Yahya Sarea គឺជាអ្នកនាំពាក្យក្រុមឧទ្ទាមហ៊ូទីយេម៉ែន និយាយកាលពីថ្ងៃពុធថា កងកម្លាំងរបស់លោក បានបើកប្រតិបត្តិការសឹក មានគោលដៅវាយប្រហារលើនាវា ៣គ្រឿងនៅក្នុងសមុទ្រក្រហម និងសមុទ្រអារ៉ាប់ ។

ក្រុមឧទ្ទាមហ៊ូទី ដែលគ្រប់គ្រងតំបន់មានពលរដ្ឋរស់នៅច្រើនបំផុតរបស់យេម៉ែន និងសម្របខ្លួនតាមអ៊ីរ៉ង់ បានវាយប្រហារនាវានៅជិតតំបន់ឆ្នេររបស់ខ្លួនអស់រយៈពេលជាច្រើនខែមកហើយ ដោយពួកគេនិយាយថា ការវាយប្រហារបែបនេះ ដើម្បីបង្ហាញសាមគ្គីភាពជាមួយជនប៉ាឡេស្ទីនដែលកំពុងធ្វើសង្រ្គាមជាមួយអ៊ីស្រាអែលនៅតំបន់ហ្កាហ្សាស្រ្ទីប ។

លោក Saree បាននិយាយនៅក្នុងសុន្ទរកថាលើកញ្ចក់ទូរទស្សន៍ថា ក្រុមជីវពលហ៊ូទី មានគោលដៅលើនាវា ២គ្រឿងនៅក្នុងសមុទ្រក្រហម គឺនាវា Roza និងនាវា Vantage Dream ដោយប្រើប្រាស់មីស៊ីលជាច្រើនគ្រាប់ និងយានដ្រូនជាច្រើនគ្រឿង ។

លោកថា នាវាទី ៣ គឺនាវា Maersk Seletar របស់សហរដ្ឋអាមេរិក បានក្លាយជាគោលដៅវាយប្រហារនៅក្នុងសមុទ្រអារ៉ាប់ ដោយប្រើប្រាស់យានដ្រូនជាច្រើនគ្រឿង ៕