រដ្ឋមន្ត្រីការបរទេសអូស្ត្រាលី លោកស្រី Penny Wong បាននិយាយថា ទីក្រុងកង់បេរ៉ា ចង់បានទំនាក់ទំនងកាន់តែស៊ីជម្រៅបន្ថែមទៀតជាមួយប្រទេសជិតខាងកោះប៉ាស៊ីហ្វិក គឺសូឡូម៉ុន និងជាមួយតំបន់ដែលធ្វើការសម្រេចចិត្ត «ដោយគ្មានការភ័យខ្លាច» ខណៈដែលប្រទេសចិនក៏បានបញ្ជូនបេសកជនរបស់ខ្លួនទៅកាន់ទីក្រុង Honiara ដើម្បីជួបនាយករដ្ឋមន្ត្រីថ្មី លោក Jeremiah Manele។

នៅឯទីក្រុង Honiara នាថ្ងៃព្រហស្បតិ៍ (ទី៦ ខែមិថុនា) នេះ លោកស្រី Wong បាននិយាយថា ប្រទេសអូស្ត្រាលី គឺជាដៃគូអភិវឌ្ឍន៍ដ៏ធំបំផុតរបស់កោះសូឡូម៉ុន ហើយបានបញ្ជូនសមាជិករដ្ឋាភិបាលជាន់ខ្ពស់បំផុតលំដាប់ទី២ និងទី៣ របស់ខ្លួនទៅជួបលោក Manele ចាប់តាំងពីលោកជាប់ឆ្នោត កាលពីខែមុន ដោយសារតែខ្លួនចង់ធ្វើឲ្យទំនាក់ទំនងកាន់តែស៊ីជម្រៅ។

អមដោយការសន្យាផងដែរ ក្នុងការផ្តល់នូវទឹកប្រាក់ ៣,៤លានដុល្លារ សម្រាប់ហេដ្ឋារចនាសម្ព័ន្ធរបស់សាលារៀនចំនួន៤០ អំឡុងដំណើរទស្សនកិច្ចរយៈពេល ២ថ្ងៃរបស់ខ្លួន លោកស្រីបានប្រាប់អ្នកសារព័ត៌មានថា៖ «យើងចង់បានតំបន់ប្រជុំកោះប៉ាស៊ីហ្វិក ដែលពួកយើងទាំងអស់គ្នា អាចធ្វើការសម្រេចចិត្តដោយខ្លួនឯង អាចអនុវត្តអធិបតេយ្យភាពរបស់យើងដោយគ្មានការភ័យខ្លាច ហើយជាកន្លែងដែលយើងទាំងអស់គ្នាអាចរីកចម្រើន និងរួមរស់ជាមួយគ្នាដោយសន្តិភាព»។

សម្រាប់លោក Manele លោកបានប្រាប់រដ្ឋមន្ត្រីការពារជាតិអូស្ត្រាលី លោក Richard Marles ដែលបានធ្វើទស្សនកិច្ចកាលពីខែមុនថា រដ្ឋាភិបាលរបស់លោកកំពុងធ្វើការត្រួតពិនិត្យសន្តិសុខ ដើម្បីកំណត់អនាគតនៃកិច្ចសហប្រតិបត្តិការរក្សាផ្ដល់កម្លាំងនគរបាល។

ដោយឡែកប្រទេសចិនបានជួយផ្តល់ជំនួយជាបន្តបន្ទាប់ដល់ប្រទេសនេះ ដូចជាហេដ្ឋារចនាសម្ព័ន្ធ កម្លាំងនគរបាល សុខភាព ការអប់រំ ថាមពល និងការគាំទ្រផ្នែកកសិកម្មជាដើម គិតចាប់តាំងពីកោះសូឡូម៉ុន បានបង្វែរទំនាក់ទំនងការទូតពីកោះតៃវ៉ាន់ទៅកាន់ទីក្រុងប៉េកាំងវិញ ក្នុងឆ្នាំ២ផ១៩ ហើយក្នុងជំនួបជាមួយបេសកជនចិន កោះសូឡូម៉ុន បានបញ្ជាក់ថា ខ្លួននឹង «បន្តពង្រឹង» ទំនាក់ទំនងរវាងប្រទេសទាំង២៕