ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពថ្ងៃពុធ បានព្រមានប្រទេសអាល្លឺម៉ង់ ប្រឆាំងនឹងការបញ្ជូនមីស៊ីលតម្រង់គោលដៅ Taurus ទៅកាន់ប្រទេសអ៊ុយក្រែន។

នៅទីក្រុង St Petersburg លោកពូទីន បាននិយាយនៅសន្និសីទសារព័ត៌មានមួយជាមួយទីភ្នាក់ងារព័ត៌មានអន្តរជាតិធំៗ រួមទាំងសារព័ត៌មាន dpa ផងដែរថា ប្រសិនបើ [... ]មីស៊ីលណាមួយលេចឡើង ដែលអាចវាយប្រហារលើសម្ភារៈនានា នៅលើទឹកដីរុស្ស៊ី នោះគឺជាការពិតណាស់ វានឹងបំផ្លាញទំនាក់ទំនងរុស្ស៊ី-អាល្លឺម៉ង់ម្តងហើយម្តងទៀត»។

ទំនាក់ទំនងរវាងមហាអំណាចទាំងពីរ មានការរង្គោះរង្គើ ចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងខែកុម្ភៈ ឆ្នាំ ២០២២។ លោក ពូទីន មិនបាននិយាយថា តំបន់ណាមួយ នឹងត្រូវបាន «បំផ្លាញ» បន្ថែមទៀត នៅក្នុងករណ៍មានការបញ្ជូនមីស៊ីលTaurus ទៅឲ្យអ៊ុយក្រែននោះ។

ការផ្គត់ផ្គង់មីស៊ីល Taurus ដែលអាចកើតមានដល់អ៊ុយក្រែន បានបង្កឲ្យមានការជជែកពិភាក្សាដ៏សំខាន់មួយនៅក្នុងប្រទេសអាល្លឺម៉ង់។ លោកអធិការបតី អូឡាហ្វ សូល ( Olaf Scholz) មានការស្ទាក់ស្ទើរក្នុងការអនុញ្ញាតឲ្យដឹកជញ្ជូន ទោះបីជាថ្មីៗនេះ លោកបានយល់ព្រមឲ្យទីក្រុងគីវប្រើប្រាស់អាវុធដែលផ្គត់ផ្គង់ដោយអាល្លឺម៉ង់ នៅលើទឹកដីព្រំដែនរុស្ស៊ី ដើម្បីការពារទីក្រុងខាគីវភាគឦសាននៃប្រទេសអ៊ុយក្រែនក៏ដោយ។