​ឥណ្ឌា៖ សញ្ញា​នៃ​ករណី​ឆ្លង​វីរុស​ COVID-19 រលក​ទី​៣ បាន​លេចចេញ​នៅ​ប្រទេស​ឥណ្ឌា ​ដែល​មាន​រដ្ឋ​យ៉ាងហោចណាស់​ចំនួន ១០ រួម​ទាំង​រដ្ឋ Tamil Nadu, រដ្ឋ Karnataka និង​រដ្ឋ Kerala ក្នុង​ភាគ​ខាង​ត្បូងកំពុង​រាយការណ៍​ពី​ការ​កើន​ឡើង​នៃ​តម្លៃ R ឬកត្តា​ចម្លង​បន្ត ដែល​មានន័យថា​ អ្នក​ឆ្លង​ម្នាក់ៗ​នឹង​ចម្លង​វីរុស​កូ​រ៉ូ​ណា​ទៅ​មនុស្ស​កាន់​តែ​ច្រើនក្នុង​រយៈពេល​ ​៣​ខែ​កន្លងទៅ​។​

​តម្លៃ R ឬកត្តា​ចម្លង​បន្ត​គឺជា​ឧបករណ៍​ដ៏​សំខាន់​មួយ​ ដែល​អ្នក​ជំនាញ​ខាង​ជំងឺ​រាតត្បាត​សកល ​និង​អ្នកបង្កើត​គោលនយោបាយ​ប្រើ ​ដើម្បី​ពិនិត្យមើល​អត្រា​ប្រេ​វ៉ាឡង់​ និង​ការ​រីក​រាលដាល​នៃ​វីរុស Covid-19។​ ពេលនេះ​តម្លៃ R ឬកត្តា​ចម្លង​បន្ត​ជា​មធ្យម​របស់​ប្រទេស​ឥណ្ឌា​គឺ ១.០១​។ នេះ​មាន​ន័យ​ថា សម្រាប់​មនុស្ស​ម្នាក់​ដែល​បាន​ឆ្លងគឺ​នឹង​ចម្លង​វីរុស​កូ​រ៉ូ​ណា ​ទៅកាន់​មនុស្ស​ផ្សេង​ទៀត​ច្រើន​ជាង​ម្នាក់​។​ នៅ​ពេល​ដែល​ប្រទេស​នេះ​ត្រូវ​បាន​រង​ការវាយប្រហារ​ពីរ​លក​ទី​២​នៃ​វីរុស Covid-19 ដ៏​មហន្តរាយ​កាលពី​ខែ​ឧសភា R-value មាន​កម្រិត​ប្រហែល​ ១.៤ ប៉ុន្តែ​វា​បាន​ធ្លាក់​ចុះ​មក​នៅ​ប្រហែល ​០.៩ កាលពី​មួយ​ខែ​មុន​។ តម្លៃ R ឬកត្តា​ចម្លង​បន្តដែល​កើន​ឡើង​លើស​ពី​ ១​ ជាថ្មីកំពុង​ធ្វើ​ឱ្យ​ក្រុម​អ្នក​ជំនាញ​សុខភាព​ព្រួយបារម្ភ ​ព្រោះ​វា​ជា​សញ្ញា​នៃ​អត្រា​ឆ្លង​កើន​ឡើង​ខ្ពស់​៕

អត្ថបទ៖ សុខមាន