រដ្ឋមន្ត្រីការបរទេសអេស្ប៉ាញ លោក Jose Manuel Albares នៅថ្ងៃព្រហស្បតិ៍ (ទី៦ ខែមិថុនា) បាននិយាយថា ប្រទេសរបស់លោកបានស្នើសុំធ្វើអន្តរាគមន៍ ក្នុងសំណុំរឿងប្រល័យពូជសាសន៍របស់អាហ្វ្រិកខាងត្បូង ពោលគឺជាបណ្ដឹង ដែលត្រូវបានធ្វើឡើងប្រឆាំងនឹងសកម្មភាពរបស់អ៊ីស្រាអែល នៅតំបន់ហ្កាហ្សា នៅឯតុលាការយុត្តិធម៌អន្តរជាតិ (ICJ)។

ការសុំលូកដៃចូលនេះ មានន័យថា អេស្ប៉ាញចូលរួមជាមួយប្រទេសមួយចំនួនតូចផ្សេងទៀត ដែលបាននិយាយថា ពួកគេចង់ធ្វើអន្តរាគមន៍ ក្នុងនោះរួមទាំងអៀរឡង់ផងដែរ ដែលប្រទេសនេះរួមជាមួយអេស្ប៉ាញ និងន័រវ៉ែស បានទទួលស្គាល់ជាផ្លូវការនូវរដ្ឋប៉ាឡេស្ទីន កាលពីសប្តាហ៍មុន។

លោក Albares បាននិយាយថា ទីក្រុងម៉ាឌ្រីដចង់គាំទ្រ ICJ ក្នុងការអនុវត្តវិធានការរបស់ខ្លួន ក្នុងនោះរួមទាំងការបញ្ជាឲ្យអ៊ីស្រាអែលបញ្ឈប់ប្រតិបត្តិការយោធារបស់ខ្លួន ក្នុងទីក្រុងរ៉ាហ្វាហ៍ នៅភាគខាងត្បូងតំបន់ហ្កាហ្សាផងដែរ ប៉ុន្តែបានផ្តល់ព័ត៌មានលម្អិតខ្លះៗ អំពីអ្វីដែលការស្នើសុំអន្តរាគមន៍របស់ខ្លួន នឹងទាមទារឲ្យមាននោះ។

គួរបញ្ជាក់ថា កាលពីខែមុន បញ្ជារបស់ចៅក្រម ICJ ទៅកាន់អ៊ីស្រាអែល ដើម្បីឲ្យបញ្ឈប់ភ្លាមៗនូវការវាយលុកផ្នែកយោធារបស់ខ្លួនលើទីក្រុងរ៉ាហ្វាហ៍ គឺជាសេចក្តីសម្រេចគ្រាអាសន្នដ៏សំខាន់មួយ បន្ទាប់ពីមានការសម្រេចរបស់អាហ្វ្រិកខាងត្បូង ក្នុងការនាំយកសំណុំរឿងប្រឆាំងនឹងអ៊ីស្រាអែល ដោយចោទប្រកាន់ថា ប្រទេសនេះបានប្រព្រឹត្តអំពើប្រល័យពូជសាសន៍៕