​អា​ហ្វ​ហ្គា​នី​ស្ថាន​៖ គណៈកម្មាធិការ​កាកបាទ​ក្រហម​អន្តរជាតិ (ICRC) បាន​និយាយ​ថា ​ជម្លោះ​កាន់​តែ​ខ្លាំង​ឡើង​នៅ​ក្នុង​ប្រទេស​អា​ហ្វ​ហ្គា​នី​ស្ថាន ​បាន​នាំ​ឱ្យ​ចំនួន​ជនរងគ្រោះ​ជា​ជន​ស៊ីវិល​រង​របួស​កើន​ឡើង​។

​គណៈកម្មាធិការ​កាកបាទ​ក្រហម​អន្តរជាតិ​បាន​និយាយ​ថា ​បុគ្គលិក​របស់​ខ្លួន​បាន​ព្យាបាល​ជនជាតិ​អា​ហ្វ​ហ្គា​នី​ស្ថាន​ជាង ៤.០០០​នាក់​នៅ​ខែ​នេះ​នៅ​ក្នុង​មន្ទីរពេទ្យ​ចំនួន ១៥ របស់​ពួកគេ​នៅ​ទូទាំង​ប្រទេស​រួម​ទាំង​នៅ​ខេត្ត Helmand​ និង​ខេត្ត Kandahar ជាទី​ដែល​ការវាយប្រហារ​តាម​អាកាស​របស់​អា​ហ្វ​ហ្គា​នី​ស្ថាន​ និង​អាមេរិក​កំពុង​ព្យាយាម​រារាំង​ការ​វាយ​លុក​របស់​ពួក​តា​លី​បង់​។​ ​លោក Eloi Fillion ប្រធាន​គណៈប្រតិភូ​រប​ស់ ICRC នៅ​អា​ហ្វ​ហ្គា​នី​ស្ថាន​បាន​និយាយ​ថា ​ខណៈ​ដែល​ការ​ប្រយុទ្ធ​គ្នា​កាន់​តែ​ខ្លាំង​ឡើង​ វា​កាន់តែ​ពិបាក​សម្រាប់​អង្គការ​សុខភាព​ក្នុង​ការ​ផ្ដល់​សេវា​ដល់​ប្រជាជន​ដែល​ត្រូវការ​។​

​ក្រុម​បះបោរ​វាយ​ដណ្តើម​បាន​ទីក្រុង​ចំនួន ៥ ក្នុងចំណោម​ខេត្ត​ចំនួន ៣៤ នៅ​ក្នុង​ប្រទេស​ក្នុង​រយៈពេល​តិច​ជាង​មួយ​សប្តាហ៍​។​ ​ឥឡូវនេះ​ពួកគេ​កំពុង​ប្រយុទ្ធ​ជាមួយ​រដ្ឋាភិបាល​ ដែល​គាំទ្រ​ដោយ​លោក​ខាង​លិច​ដើម្បី​កាន់កាប់តំបន់​ចំនួន ៣ផ្សេងទៀត​រួម​ទាំង​ទីក្រុង Lashkar Gah ជា​រដ្ឋធានី​នៃ​ខេត្ត Helmand ភាគ​ខាង​ត្បូង ​និង​ទីក្រុង Kandahar ជា​រដ្ឋធានី​របស់​ខេត្ត Kandahar ដែល​នៅ​ជិតខាង​៕

អត្ថបទ៖ សុខមាន