យោងតាមការិយាល័យប្រព័ន្ធផ្សព្វផ្សាយរដ្ឋាភិបាលក្នុងដែនដី ហ្កាហ្សា ការវាយប្រហារតាមអាកាសរបស់ អ៊ីស្រាអែលបានដាក់គោលដៅទៅលើសាលារៀនរបស់ទីភ្នាក់ងារជំនួយ និងការងាររបស់អង្គការសហប្រជាជាតិ (UNRWA) នៅក្នុងជំរំជនភៀសខ្លួន នូសេរ៉ាត់ (Nuseirat) ដោយបានសម្លាប់ជនស៊ីវិលប៉ាឡេស្ទីនយ៉ាងហោចណាស់ ៤០ នាក់ រួមទាំងកុមារ ១៤នាក់ ។

ការវាយប្រហារនេះបានទាក់ទាញការថ្កោលទោសជាសកល និងអំពាវនាវឱ្យមានការស៊ើបអង្កេតឯករាជ្យ។ សាលារៀននេះកំពុងផ្តល់ជម្រកដល់ជនភៀសខ្លួនប៉ាឡេស្ទីនចំនួន៦.០០០នាក់ ដែលបានភៀសខ្លួនចេញពីការលុកលុយ នៅតែបន្តរបស់អ៊ីស្រាអែល នៅទូទាំងតំបន់ហ្កាហ្សា ហែកហួរដោយសង្រ្គាម។

អង្គការសហប្រជាជាតិ បានថ្កោលទោសការវាយប្រហាររបស់អ៊ីស្រាអែលលើសាលារៀន នៅក្នុងដែនហ្កាហ្សា ដោយហៅការវាយប្រហារនេះថាជាហេតុការណ៍ដ៏តក់ស្លត់។

អ្នកបានឃើញហេតុការណ៍នេះ បានរាយការណ៍ថា ការវាយប្រហារតាមអាកាសនេះ បានកើតឡើងកាលពីយប់ថ្ងៃព្រហស្បតិ៍ទី៦ មិថុនា សប្ដាហ៍នេះ ដោយគ្មានការព្រមានជាមុន ហើយបានបំផ្លិចបំផ្លាញអគារ និង បណ្តាលឲ្យជនស៊ីវិលយ៉ាងច្រើនបាត់បង់ជីវិត។ប្រភពនានាពីផ្នែកវេជ្ជសាស្ត្រនៅហ្កាហ្សានិយាយថាចំនួនអ្នកស្លាប់អាចនឹងកើនឡើង ខណៈប្រតិបត្តិការជួយសង្គ្រោះនៅតែបន្ត។

UNRWA បានបង្ហាញក្ដីព្រួយបារម្ភយ៉ាងខ្លាំងចំពោះការវាយប្រហារនេះ។ ទីភ្នាក់ងារនេះបាននិយាយនៅលើបណ្ដាញសង្គម X ថា ទីជម្រកដែលប្រែក្លាយពីសាលារៀនរបស់ UNRWA មួយផ្សេងទៀតត្រូវបានវាយប្រហារទាំងយប់អធ្រាត្រ ពីកងកម្លាំងអ៊ីស្រាអែល ដោយគ្មានមានការព្រមានជាមុនចំពោះពលរដ្ឋភៀសខ្លួន ឬ UNRWA។

ទីភ្នាក់ងារអង្គការសហប្រជាជាតិមួយនេះ ក៏បានសង្កត់ធ្ងន់ផងដែរទៅលើស្ថានភាពមនុស្សធម៌ដ៏ធ្ងន់ធ្ងរនៅក្នុងទឹកដីដ៏អភ័ព្វហ្កាហ្សា ដែលកាន់តែធ្ងន់ធ្ងរឡើងដោយសារកង្វះទឹកស្អាត អាហារ និងការកើនឡើងហានិភ័យនៃការផ្ទុះជំងឺអាសន្នរោគ ជាដើម ៕