បណ្ដាគណបក្សក្នុងសម្ព័ន្ធភាពរបស់លោកនាយករដ្ឋមន្ត្រីឥណ្ឌា Narendra Modi កាលពីថ្ងៃព្រហស្បតិ៍ ៦មិថុនា បានទាមទារមូលនិធិបន្ថែមទៀតសម្រាប់រដ្ឋក្នុងតំបន់របស់ពួកគេ ក៏ដូចជាមុខតំណែងក្នុងជួរគណៈរដ្ឋមន្ត្រីសហព័ន្ធ ខណៈការចរចាបានចាប់ផ្តើមដើម្បីបង្កើតរដ្ឋាភិបាលចម្រុះ។

លោក Modi ត្រូវបានតែងតាំងជាមេដឹកនាំនៃសម្ព័ន្ធប្រជាធិបតេយ្យជាតិ (NDA) កាលពីថ្ងៃពុធ សប្ដាហ៍នេះ បន្ទាប់ពីគណបក្ស Bharatiya Janata (BJP) របស់លោកបានបាត់បង់បង់សំឡេងភាគច្រើន ហើយបានរកឃើញថាខ្លួន ពឹងផ្អែកលើការគាំទ្រពីគណបក្សក្នុងតំបន់ ភាគច្រើនគឺគណបក្ស តេលូហ្គូ ដេសាំ (Telugu Desam) (TDP) និង គណបក្ស ចាណាតាដាល យូណាយធីត(Janata Dal United) ។

សម្ព័ន្ធប្រជាធិបតេយ្យជាតិ បានឈ្នះសំឡេងចំនួន២៩៣ អាសនៈ ក្នុងចំណោមអាសនៈសរុប ៥៤៣នៅក្នុងសភាជាន់ទាប ហើយបើគណបក្សណាមួយទទួលបាន ២៧២ អាសនៈគឺអាចបង្កើតរដ្ឋាភិបាលសំឡេងតិចតួចស្ដួចស្ដើងបាន ។

ប៉ុន្តែគណបក្ស BJP របស់លោក Modi បានឈ្នះត្រឹមតែ ២៤០ អាសនៈប៉ុណ្ណោះ ដែលធ្វើឱ្យមេដឹកនាំគណបក្ស TDP លោក ចាន់ដ្រាបាប៊ូ ណៃឌូ (Chandrababu Naidu) និងមេដឹកនាំគណបក្ស ចាណាតាដាល យូណាយធីត លោក នីទីស គូម៉ា(Nitish Kumar) និងជារដ្ឋមន្ត្រីប្រចាំរដ្ឋប៊ីហា ក្លាយជាបក្សបង្គ្រប់សំឡេង នៅក្នុងសម្ព័ន្ធភាពនេះ ដោយមាន ១៦អាសនៈ និង១២អាសនៈ។

យោងតាមអ្នកនាំពាក្យគណបក្ស TDP មួយរូប និងប្រភពចំនួន៥ពីគណបក្ស NDA បានឱ្យដឹងថា ភាគីទាំងពីរកំពុងជំរុញការទាមទារដ៏យូរមកហើយក្នុងការផ្តល់ឋានៈពិសេសដល់រដ្ឋ ដែលពួកលោកគ្រប់គ្រង។

ឋានៈពិសេសអនុញ្ញាតឱ្យរដ្ឋទទួលបានមូលនិធិអភិវឌ្ឍន៍សហព័ន្ធកាន់តែច្រើន និងលក្ខខណ្ឌនានាកាន់តែសាមញ្ញជាងមុន។ ខណៈរដ្ឋប៊ីហា គឺជារដ្ឋក្រីក្របំផុតរបស់ប្រទេសឥណ្ឌា ហើយរដ្ឋ អាន់ដ្រាប្រទេស (Andhra Pradesh)បានបាត់បង់ធនធានមួយចំនួនរបស់ខ្លួននៅក្នុងឆ្នាំ២០១៤៕