រលកកម្តៅដ៏ខ្លាំងក្លានៅដើមរដូវក្តៅ បានឡើងខ្ពស់ខ្លាំងកាលពីថ្ងៃព្រហស្បតិ៍ (៦ មិថុនា) នៅទូទាំងភាគខាងលិចនៃសហរដ្ឋអាមេរិក ដែលមនុស្សរាប់លាននាក់កំពុងព្យាយាមទប់ទល់នឹងការកើនឡើងយ៉ាងខ្លាំងនៃសីតុណ្ហភាពដ៏ភ្លាមៗនេះ។

ទីក្រុង ឡាស វេហ្កាស (Las Vegas) កំពុងត្រូវដុតកម្លោចនៅក្នុងកម្ដៅ ៤៤ អង្សារសេ ខណៈដែលនៅក្នុងតំបន់វាលខ្សាច់នៅទីតាំងទេសចរដ៏ពេញនិយមឈ្មោះ ជ្រលងមរណៈ (Death Valley) សីតុណ្ហភាពត្រូវបានគេរំពឹងថានឹងឡើងលើសពី ៥០ អង្សារសេ ដោយសារតែប្រព័ន្ធអាកាសធាតុសម្ពាធខ្ពស់ដែលគ្របដណ្ដប់ក្នុងតំបន់។

សេវាអាកាសធាតុជាតិបាននិយាយថា «ការរីករាលដាលនៃសីតុណ្ហភាពខ្ពស់ និងទាប ទំនងជាត្រូវបានកើនឡើងខ្លាំងរវាងរដ្ឋ កាលីហ្វ័រនីញ៉ា (California) រដ្ឋ ណេវ៉ាដា (Nevada) និងរដ្ឋ អារីហ្ស៊ូណា (Arizona)»។ ក្រុមអ្នកជំនាញព្រមានថា សីតុណ្ហភាពក្តៅខ្លាំងមិនសមហេតុផល អាចបង្ហាញពីការចាប់ផ្តើមនៃរដូវក្តៅដ៏ក្ដៅគគុក។ សីតុណ្ហភាពក្តៅដ៏គ្រោះថ្នាក់នៅទីក្រុង ឡាស វេហ្កាស បានកើនឡើងពី ១០ ទៅ ១៥ អង្សារសេលើសពីកម្រិតមធ្យម ហើយការណែនាំអំពីកម្ដៅខ្លាំង ត្រូវបានបន្តដល់ថ្ងៃសៅរ៍។

ខណៈពេលដែលសីតុណ្ហភាពអាចនឹងត្រជាក់បន្តិចនៅក្នុងប៉ុន្មានថ្ងៃខាងមុខនេះ រលកកម្ដៅត្រូវបានគេរំពឹងថានឹងពង្រីកទៅភាគខាងជើងទៅកាន់រដ្ឋ អូរ៉េហ្កន (Oregon) និងទីក្រុង វ៉ាស៊ីនតោន (Washington) នៅថ្ងៃសុក្រ (០៧ មិថុនា) និងថ្ងៃសៅរ៍ (០៨ មិថុនា) ប៉ុន្តែតំបន់ឆ្នេរដែលមានប្រជាជនរស់នៅច្រើន រួមទាំងទីក្រុង ឡូស អែនជឺលេស (Los Angeles) ហាក់ដូចជាត្រូវបានរួចផុតពីកម្ដៅដ៏អាក្រក់នេះ៕