ភ្នំពេញ ៖ អាស៊ាននឹងជំរុញបង្កើតក្របខណ្ឌរឹងមាំ និងកាលានុវត្តន៍ភាព សម្រាប់ការអភិវឌ្ឍ និងប្រើប្រាស់បច្ចេកវិទ្យាបញ្ញាសិប្បនិម្មិត ក្នុង ទិសដៅជំរុញលើកកម្ពស់ការអភិវឌ្ឍប្រកបដោយនិរន្តរភាព ការប្រកាន់ខ្ជាប់នូវក្រមសីលធម៌ និងគុណតម្លៃនៃមនុស្សជាតិ។

​ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងកិច្ចប្រជុំរដ្ឋមន្រ្តី អាស៊ាន ផ្នែកវិទ្យាសាស្រ្ត បច្ចេកវិទ្យា និងនវានុវត្តន៍លើកទី ២០ ក្រោមប្រធានបទ «ការប្រើប្រាស់បញ្ញាសិប្បនិម្មិត៖ដំណើរឆ្ពោះទៅ អនាគត» នៅថ្ងៃទី ៧ ខែ មិថុនា ឆ្នាំ ២០២៤ នេះថា នៅតាមបណ្តាប្រទេសទាំងដប់របស់អាស៊ាន ប្រទេសនីមួយៗបានបង្កើតកិច្ចខិត ខំប្រឹងប្រែង ក្នុងការពង្រឹងស្ថាប័នពាក់ព័ន្ធលើវិស័យវិទ្យាសាស្រ្ត បច្ចេកវិទ្យា និងនវានុវត្តន៍ ក្នុងគោលបំណងដើម្បីជំរុញកំណើន សេដ្ឋកិច្ច និងការអភិវឌ្ឍនៅក្នុងតំបន់ ខណៈដែលវឌ្ឍនភាពនិងការអភិវឌ្ឍ ត្រូវបានផ្តល់អាទិភាពផ្សេងៗគ្នាទៅតាមប្រទេសនីមួយៗ។ ស្របគ្នានេះ វាជាសមិទ្ធផលដ៏ប្រពៃ ដែលប្រទេសមួយចំនួនក្នុងអាស៊ាន សម្រេចបាននូវកំណើននិងការអភិវឌ្ឍសេដ្ឋកិច្ច និងសង្គម គួរជាទីសាទរ, ភាពជោគជ័យនេះ គឺភាគច្រើនដោយសារតែការវិនិយោគទៅក្នុងវិស័យវិទ្យាសាស្រ្ត បច្ចេកវិទ្យា និងនវានុវត្តន៍។

ជុំវិញបញ្ហានេះ, ឯកឧត្តម ពិតជាមានសេចក្តីសោមនស្សរីករាយ ក្នុងការរាយការណ៍ អំពីកិច្ចប្រជុំរយៈពេលមួយសប្តាហ៍នេះ ដោយផ្តោតជាចម្បងលើការប្រមូលផ្តុំមតិពីរដ្ឋមន្ត្រីអាស៊ាន ផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ និងគណៈប្រតិភូលើប្រធានបទ «ការប្រើប្រាស់បច្ចេកវិទ្យាបញ្ញាសិប្បនិម្មិត៖ដំណើរឆ្ពោះទៅអនាគត» ដែលប្រធានបទនេះ នឹងពិភាក្សាពីសក្តានុពលដ៏ធំធេង និង ហានិភ័យទាក់ទង នឹងបញ្ញាសិប្បនិម្មិត។ កិច្ចប្រជុំថ្នាក់រដ្ឋមន្ត្រី នឹងស្វែងយល់ពីផលប៉ះពាល់នៃបញ្ញាសិប្បនិម្មិត លើគ្រប់វិស័យ សំខាន់ៗដូចជា ឧស្សាហកម្ម អប់រំ សុខាភិបាល ការប្រែប្រួលអាកាសធាតុ និងវិស័យសេវាកម្ម។

ទាក់ទិនការពិភាក្សាពីកិច្ចប្រជុំនេះដែរ, ត្រូវបានរំលេចនៅក្នុងសេចក្តីថ្លែងការណ៍រួម សម្រាប់ប្រព័ន្ធផ្សព្វផ្សាយ។ សេចក្តីថ្លែង ការណ៍នេះ នឹងចែករំលែកទស្សនៈរួមរបស់រដ្ឋមន្ត្រី និងអ្នកតំណាង ហើយនឹងសង្កត់ធ្ងន់លើផ្នែកសំខាន់ៗ សម្រាប់គម្រោងវិទ្យាសាស្ត្រ បច្ចេកវិទ្យា និងនវានុវត្តន៍ក្នុងប៉ុន្មានឆ្នាំខាងមុខនេះ។ គោលដៅសំខាន់គឺបង្កើតក្របខណ្ឌរឹងមាំ និងកាលានុវត្តន៍ភាព សម្រាប់ការ អភិវឌ្ឍ និងប្រើប្រាស់បច្ចេកវិទ្យាបញ្ញាសិប្បនិម្មិត ដែលលើកកម្ពស់ការអភិវឌ្ឍប្រកបដោយនិរន្តរភាព ដោយប្រកាន់ខ្ជាប់នូវ ក្រមសីលធម៌ និងគុណតម្លៃនៃមនុស្សជាតិ។ បញ្ហានេះ, យើងត្រូវការជាបន្ទាន់ ដើម្បីបង្កើតគោលការណ៍ណែនាំ និងក្របខណ្ឌ ច្បាស់លាស់ សម្រាប់ការប្រើប្រាស់បញ្ញាសិប្បនិម្មិតនៅក្នុងតំបន់របស់យើង ស្របតាមគោលដៅស្នូល នៃផែនការសហគមន៍អាស៊ាន របស់យើង ដែលផ្តោតលើមនុស្ស៕

អត្ថបទ៖ សុន រ៉ាឌី