នៅថ្ងៃទី៧ ខែមិថុនានេះ លោក សយ ស៊ីណុល ប្រធានមន្ទីរទេសចរណ៍ខេត្តកំពត បាន​ដឹកនាំ​ប្រតិភូ​ផែពហុបំណងខេត្តកំពត និងបណ្តាអាជីវកម្មទេសចរណ៍មួយចំនួនទៀត ចូលរួមពិព័រណ៍​ធុរកិច្ចកម្ពុជា វៀតណាម ថៃ CVTEC ២០២៤ នៅកោះឆាង ខេត្តត្រាតប្រទេសថៃ។ តាមរយៈ​ការ​ចូលរួម​ពិព័រណ៍នេះ លោក សយ ស៊ីណុល រំពឹងថា នឹងជំរុញកំណើន​ទេសចរ​អន្តរជាតិ​ទៅ​ទស្សនា​ខេត្តកំពត ពិសេសក្រោយកំពុងផែពហុបំណងខេត្ត បើកដំណើរការ។

លោក សយ ស៊ីណុល ថ្លែងថា នៅក្នុងជំនួបធុរៈជន កម្ពុជា វៀតណាម ថៃ Cambodia- Vietnam- Thai Economic Corridor , CVTEC នៅក្នុងឆ្នាំ២០២៤ គឺមាន​គោល​បំណង​សំខាន់​ធ្វើ​ការ​សិក្សា និងសហការបង្កើតឲ្យមានការផ្តល់សេវាទេសចរណ៍ និងពាណិជ្ជកម្ម តាមផ្លូវទឹក​សមុទ្រ​ ដោយតភ្ជាប់ពី តំបន់ឆ្នេរ និងកោះនានានៅខេត្តព្រះសីហនុ កំពត កែប និងខេត្តកោះកុង ប្រទេស​កម្ពុជា មកកាន់តំបន់ ឆ្នេរ កោះ កុដ កោះឆាង កោះមាក់ នៅក្នុងខេត្តតា្រតប្រទេសថៃ និង​មិនធ្លាប់មានពីមុនមក។

លោក សយ ស៊ីណុល ថ្លែងថា តាមរយៈជំនួបធុរជន CVTEC ឆ្នាំនេះ នឹង​ជំរុញ​ឲ្យ​ខេត្ត​កំពត​ទាក់​ទាញ​បាន​ទេសចរអន្តជាតិពីប្រទេសថៃ ទៅទស្សនាខេត្តកំពត កាន់តែច្រើនថែមទៀត ជាពិសេស​ស្រប​ពេល​ម្សិលមិញនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញជា​គណៈ​អធិបតី​ដ៏ខ្ពស់ខ្ពស់ បើកកំពង់ពហុផែពហុបំណងនៅខេត្តកំពត។

លោក ធួន សីណាន ប្រធានសមាគមទេសចរណ៍អាស៊ីភិចPATA ប្រចាំនៅកម្ពុជា ថ្លែងថា នេះ​ជា​លើក​ដំបូង ដែល បណ្តាញ CVTEC បានសហការរៀបចំពិព័រណ៍ធុរកិច្ច ខេត្តត្រាត ឆ្នាំ២០២៤ ចាប់​ពីថ្ងៃទី៥ដល់ថ្ងៃទី៨ ខែមិថុនានេះ បំណងជំរុញឲ្យបណ្តាក្រុមហ៊ុន និងបណ្តា​ធុរជន​ក្នុង​វិស័យ​ទេសចរណ៍​ពីកម្ពុជា ប្រមាណ២០ក្រុមហ៊ុន ថៃមាន២៥ក្រុមហ៊ុន និងក្រុមហ៊ុន​ទេសចរណ៍​ជា​ច្រើន​ទៀត​មកពីប្រទេសវៀតណាម ជួបជុំគ្នាបង្កើតដៃគូអាជីវកម្ម រួមគ្នាផ្សព្វផ្សាយ​ទីផ្សារ​គោល​ដៅ​ទេសចរណ៍​កោះឆ្នេរដែលមានសក្តានុពល និងជំរុញពង្រីក​បើក​ការ​ដឹក​ជញ្ជូន​ទេសចរណ៍​តាម​ផ្លូវ​ទឹក​សមុទ្រ ដោយតភ្ជាប់ពី តំបន់ឆ្នេរ និងកោះនានានៅខេត្តព្រះសីហនុ កំពត កែប និង​ខេត្ត​កោះកុង ប្រទេសកម្ពុជា បណ្តាកោះឆ្នេរ ខេត្តប្រទេសថៃ ខេត្តកាម៉ៅ ប្រទេសវៀតណាម៕ អត្ថបទ ស៊ុម សុខជា