ប្រធានាធិបតីសហរដ្ឋអាមេរិក លោក Joe Biden និយាយថា ប្រទេសអ៊ុយក្រែន ពុំត្រូវបានអនុញ្ញាតឱ្យប្រើប្រាស់សព្វាវុធរបស់អាមេរិក សម្រាប់ការវាយប្រហារទៅលើទីក្រុងមូស្គូនោះទេ។ លោក Biden បាននិយាយនៅក្នុងបទសម្ភាសន៍ជាមួយទូរទស្សន៍ ABC កាលពីថ្ងៃព្រហស្បតិ៍ថា សព្វាវុធរបស់សហរដ្ឋអាមេរិក ត្រូវបានអនុញ្ញាតឱ្យប្រើប្រាស់នៅក្នុងប្រទេសរុស្ស៊ី តែនៅជិតព្រំដែនជាមួយអ៊ុយក្រែន។ លោក និយាយថា សហរដ្ឋអាមេរិក មិនអនុញ្ញាតឲ្យមានការវាយប្រហារនៅក្នុងទីក្រុងមូស្គូ លើវិមានក្រឹមឡាំងនោះទេ។

កាលពីពេលថ្មីៗនេះ លោក Biden បានអនុម័តលើការប្រើប្រាស់សព្វាវុធអាមេរិក ដោយប្រទេសអ៊ុយក្រែន ដើម្បីវាយប្រហារកងកម្លាំងរុស្ស៊ី នៅផ្នែកម្ខាងនៃព្រំដែន។ កាលពីពេលមុន សហរដ្ឋអាមេរិក បានអនុញ្ញាតឱ្យទីក្រុងគីវ ប្រើប្រាស់អាវុធដែលផ្គត់ផ្គង់ដោយសហរដ្ឋអាមេរិក ប្រឆាំងកងទ័ពរុស្ស៊ីតែនៅក្នុងទឹកដីអ៊ុយក្រែន។ ការផ្លាស់ប្តូរគោលនយោបាយរបស់សហរដ្ឋអាមេរិក បានធ្វើឡើងបន្ទាប់ពី រុស្ស៊ី បានបង្កើនការវាយលុករបស់ខ្លួន ជាពិសេសនៅតំបន់ភាគខាងកើតទីក្រុង Kharkiv ។

កាលពីថ្ងៃពុធ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានព្រមានអំពីវិធានការសងសឹកប្រឆាំងទៅនឹងទង្វើរបស់សហរដ្ឋអាមេរិក និងប្រទេសដទៃទៀត ដែលអនុញ្ញាតឱ្យអ៊ុយក្រែន វាយប្រហារគោលដៅនានា នៅក្នុងប្រទេសរុស្ស៊ី ដោយប្រើប្រាស់អាវុធផ្គត់ផ្គង់ដោយប្រទេសលោកខាងលិច។

លោក Biden ទំនងជាសង្ឃឹមថា នឹងបញ្ចៀសភាពតានតឹងដែលរីកធំបន្ថែមទៀត ជាមួយរុស្ស៊ី ដោយបញ្ជាក់ថា ការវាយប្រហារដោយប្រើប្រាស់សព្វាវុធរបស់សហរដ្ឋអាមេរិកនៅក្នុងប្រទេសរុស្ស៊ី នឹងត្រូវបានកំណត់ត្រឹមតំបន់នៅក្បែរព្រំដែនតែប៉ុណ្ណោះ។